Shillong, Jylliew 23
Ka Afghanistan Cricket Team ka la thaw ïa ka khana pateng (history) ha ka lympung T20 World Cup 2024 hadien ba pynliem noh ïa ka Australia da 21 run ha ka jingïakhun jong ka jingïalehkai Super 8 kaba la long ha ka sngi Saitjaiñ.
Haba phai sha ka jingïalehkai, ka Afghanistan kaba la tied nyngkong ka la lah ban kamai haduh 148 run bad hap noh 6 wiket na ki 20 tylli ki over. U Rahmanullah Gurbaz marwei u la tied 60 run na 49 bol, u Ibrahim Zadran u la tied 51 run na 48 bol katba kiwei ki nongtied kim shym la lah ban synñiang run bun.
U rang kawang bol ka Australia u Pat Cummins u la ïoh ïa ka hat-trick da kaba ïoh shim ïa ka wiket jong u Karim Janat, Rashid Khan bad jong u Gulbadin Naib, katba u Adam Zampa u la khur 2 wiket bad u Marcus Stoinis u la khur shi wiket.
Haba beh ïa kane ka thong, ka Australia kam shym la ïoh ïa ka jingsdang kaba paka ha kaba ki nongtied jong ka, ki la duh kloi ka wiket bad dei tang u Glenn Maxwell marwei uba la ai jingkyrmen na ka jingïoh kamai haduh 59 run na ki 41 tylli ki bol bad mar ïahap ka wiket jong u, kiwei ki la shu hap la ka hap bad ha kaba kut ka Australia ka la ïoh tang 127 run bad hap lut ki wiket na ki 19.2 over bad ban shah rem da 21 run.
U Gulbadin Naib marwei u la khur haduh 4 tylli ki wiket bad ruh u Naveen-ul-Haq u la khur 3 wiket bad u Rashid Khan, Mohammad Nabi bad u Azmatullah Omarzai ki la khur mar shi wiket.
Haba phai sha ka Afghanistan, ka la ïakynduh haduh san sien pyrshah ïa ka Australia bad ban shah rem lut ha baroh ki jingïakhun, hynrei kane ka jingïakhun ha ka T20 World Cup 2024 Super 8 ka la kylla long ha ka sien kaba nyngkong ba ka Afghanistan ka la lah ban pynliem noh ïa ka Australia.
