Agartala, Jylliew:
Ki la don kumba 30 ngut ki briew ha Khowai distrik kaba don ha Tripura kiba la shah pynkit sha ka jaka ai jingsumar hadien ba ki la kem pang kynsan ha kaba ki la ud shitom kpoh, shit met bad tlot, la ïathuh ki heh ba dei khmih. Ki doktor kiba la sumar ïa kine ki briew ki la ong ba kine ki nongpang kiba la shah sumar ha Kalyanpur Primary Health Center (PHC) ki dei kiba na ka shnong Santinagar, ha kaba ki la shitom kpoh, khie shit bad prie.
Wat lada ki doktor kim pat lah ban pynshisha ïa ka daw halor ka jingkem pang jong kine ki briew, ki la suba ba kane ka jingshitom jong ki ka lah ban long na ka jingktah ki khñiang jingpang lyngba ka um. “Ka jingsumar ïa kine ki nongpang ka dang ïai bteng. Ka tnat ka koit ka khiah ka la khmih bniah ha kaba ïadei bad kane ka jingjia ha ka shnong Santinagar,” la ong uwei na ki doktor.
