Shillong, Jylliew 26
Ka Romania, Belgium bad ka Slovakia ki la ïoh rung sha ka pre-quarter final jong ka lympung ïalehkai Euro 2024, katba ka Ukraine kan hap ban leit phai noh sha la ïing hadien ba kam shym la lah ban jop ha kane ka jingïalehkai kaba khatduh kaba la long ha ka Sngi Balang.
Haduh kaba kut ka jingïalehkai jong ka Group-E kine baroh saw tylli ki kynhun ki la kamai mar 4 point, hynrei ki la ïapher ha ka kol bad ka Ukraine ka la wan ha ka kyrdan ba khatduh jong kane ka group.
Haba phai sha kane ka jingïakhun hapdeng ka Slovakia bad ka Romania ka la long kaba ïakhaid bha ha ka rukom ïalehkai. Ka Slovakia ka la ïoh ban pynkhih jar nyngkong eh lyngba u Ondrej Duda ha ka minit kaba 24. Hadien shiteng kynta ka Romania ka la lah ban pynphai kylla lyngba penalty ba la shut da u Razvan Marin ha ka minit kaba 37 na ka bynta ban ïakhaid mar 1-1 kol haduh kaba kut jong ka kylla step.
Wat la kine ki kynhun ki la ïakhaid, hynrei ki la ïakhun tyngeh ha ka kylla miet bad haduh kaba kut kim shym la lah ban pynurlong.
Ha kawei pat ka jingïakhun hapdeng ka Ukraine bad ka Belgium ki la ïasam mar shi point hadien ba kim shym la lah ban thep kol haduh kaba kut jong ka jingïalehkai.
