Nongstoiñ, Naitung 10
Ka kynhun ïalehkai jong ka Dapboklang Giri Secondary School ha ki under-17 ki khynnah shynrang ka la ïoh ban rah ïa ka nam lahduh ha ka lympung ïalehkai District level Subroto Mukherjee Cup Football Tournament 2026 ïa kaba la pynlong da ka ophis jong ka District Sports Officers West Khasi Hills.
Nangta, ha ki under 17 ki khynnah kynthei pat ka Lurmangkara SS Risiang kala ïoh ban khur ïa ka nam lahduh, katba ha ki under-15 ki khynnah shynrang ka Kyrshai LP&UP School kala ïoh ban rah ïa kane ka nam mynta u snem jong kane ka lympung ïalehkai.
Haba phai sha kane ka lympung ïalehkai mynta u snem, ka nam jop jong ka Dapboklang Giri Secondary School ha ki under-17 ki khynnah shynrang kala wan hadien ba kala lah ban pynliem noh da 3 kol la 1 ïa ka Sib Singh Memorial Government Higher Secondary School ha ka jingïalehkai final pyrshah kaba la long ha ka Sngi Thohdieng ha madan New Nongstoiñ.
Katba, ka nam tam jong ka Lurmangkara ha ki under-17 ki khynnah kynthei pat ka dei lyngba ka jinglah ka jong ka, ban pynliem noh da 2 kol la 1 lyngba ka tie breaker hadien ka jingïakhaid khlem da don mano-mano ba ïoh ban thep kol ha ka jingïalehkai final ha kane ka juh ka sngi.
Shuh shuh ka nam jingjop jong ka Kyrshai LP&UP School pat ka long lyngba ka jinglah jong ka ban ïalehkai bha bad pynliem ruh da 3 kol la 2 ïa ka Anderson Higher Secondary School lyngba ka tie breaker hadien ka jingïakhaid ha ka jingïalehkai final da mar shikol.
Ha kane ka sngi ïa ka nam best player ha ki under-15 la ïoh ban khur da u Apbanshai Syiem Shangoi na ka Anderson Higher Secondary School, Best Goalkeeper la ïoh ban khur da u Ribankupar Parking na ka Dapboklang Giri Secondary School.
Shuh shuh ha ki under-17 ki kynthei pat ïa ka nam best player la ïoh ban khur da ka Ïahunshisha Kharbani na ka Nonglang SS, katba ïa ka nam best Goalkeeper la ïoh ban khur da ka Lily C. Marak na ka St. Xavier Higher Secondary School.
Nangta, ha ki under-17 ki shynrang ïa ka nam best player la ïoh ban khur da u Ïohborlang Lyngkhoi na ka Dapboklang Giri Secondary School, ha ka best Goalkeeper la ïoh ban khur da u Vishalfield Nongbri na ka Bethel Pres Higher Secondary School.
Ha kane ka sngi ka Deputy Commissioner ka West Khasi Hills ka Hema Nayak IAS, ha ka jingdonlang ruh u A.J. Sangma, MPS , DySP (Hq), WKH, ka District Sports Office, West Khasi Hills District Kong Balarina Syiem bad kiwei-kiwei kiba la sam ruh ïa ki khusnam.
