Srinagar, Naitung:
Ha ka jingïasiat kaba la jia ha ka Sngi U Blei, ki la don lai ngut ki lehnoh ki la ïap ha ka por ba ki bor pahara ki la tehlakam ïa ka jingthmu rungtuh jong ki ha ki bynta jong u Line of Control (LoC) ha ka thaiñ Kupwara jong ka bynta shaphang Shatei jong ka Kashmir, la ïathuh ki shipai ka tnat Indian Army.
Ki shipai ki dang bteng ban pynlong ïa ka jingleit thwet lehnoh ha ka thaiñ.
Haduh ba la thoh ïa ka khubor ym pat lah ban ithuh ne tip bniah shaphang kine ki lehnoh kiba la shah siat ïap.
Ka jingpyrshang jong kine ki lehnoh ban rung tuh ka la shah khanglad noh ha Keran Sector jong ka Kupwara ha u LoC.
“Ki la don lai ngut ki lehnoh kiba la shah siat ïap naba ki la pyrshang ban rungtuh na u LoC uba don ha bynta jong ka Keran ha kaba la ïoh ban kurup ïa ki tiar siat, pynbthei, bad kiwei pat ki tiar hiar thma,” la ïathuh ki heh jong ka kynhun Chinar Corps ha ka jingpyllait khubor lyngba ka rynsan X.
U heh pulit jong ka Control Room, ha Kupwara u la ong ba haduh ba la thoh ïa ka khubor ym pat lah ban tip eiei halor katei ka jingpyntreikam bad ka jingleit thwet lehnoh.
Kane ka jingleit khynra lehnoh ka la long tang hadien shi taïew ba ki shipai ïada ri ki la pynïap ïa 6 ngut ki lehnoh ha ki ar tylli ki jingïasiat kiba la jia ha Kulbam distrik kaba don ha ka bynta ba shaphang Shathie jong ka Kashmir ha 6 tarik bad ka 7 tarik Naitung wat haba ki shipai ki la duh noh ïa arngut ki shipai jong ka tnat kiba la ïap ha kine ki jingïasiat ba markylliang bad ki lehnoh ha kine ki jaka.
