New Delhi, Naitung 15
U Myntri Kam Pohïing ka Sorkar Pdeng, u Amit Shah un pynïaid ïa ka kylla kaba hynñiew jong ka jingïalang ba halor tam jong ka Narco-Coordination Center (NCORD) ka ban long ha ka Sngi Palei ha New Delhi.
U Myntri ha kane ka sngi, un plie ruh ïa ka ‘National Narcotics Helpline’ ka ‘MANAS’ (Madak Padarth Nisedh Asuchna Kendra) bad plie ïa ka Zonal Office jong ka Narcotics Control Bureau (NCB) ha Srinagar.
U Shah un pyllait ruh ïa ka ‘Annual Report 2023’ jong ka NCB bad ka kot halor ka ‘Nasha Mukt Bharat’.
Ka jingthmu jong ka jingïalang ka long ban ïatreilang bad pynkhlaiñ ïa ki sienjam jong ki ‘agency’ ka Sorkar Pdeng bad Sorkar Jylla kiba don bynta ha ka jingïakhun pyrshah ïa ki kam khaïi drok be-aiñ ha India.
Hapoh ka jingïalam u Myntri Rangbahduh ka ri, u Narendra Modi, ka Sorkar India ka la pdiang ïa ka ‘Zero Tolerance Policy’ pyrshah ïa ka jingkhaïi drok be-aiñ ban tehlakam ïa ki jingeh ba ïadei bad u drok.
Na ka liang ka tnad Kam Pohïing kan kot sha ka thong jong u Myntri Rangbahduh na ka bynta ka India kaba lait na u drok shuwa u 2047 lyngba ki 3 tylli ki mat treikam- ka jingpynkhlaiñ ïa ka rukom treikam, ka jingïatreilang hapdeng baroh ki ‘agency’ kiba ïadei bad ki kam pyrshah ïa u drok bad ka jingïalap ai jingtip paidbah.
Ïa ka NCORD la sdang ha u snem 2016 na ka bynta ka jingïatreilang kaba kham bha hapdeng ki Jylla bad ka tnad Kam Pohïing ka Sorkar Pdeng.
Nalor kane, la pynkhlaiñ shuh-shuh lyngba ka rukom treikam kaba saw kyrdan ha u snem 2019.
Ka don ruh ïa ka NCORD Committee kaba halor tam ka ban khlieh da u Secretary ka tnad Kam Pohïing ka Sorkar Pdeng, ka Executive Level NCORD Committee kaba khlieh da u Special Secretary, tnad Kam Pohïing, ki State Level NCORD Committee ba la khlieh da ki Chief Secretary bad ki District Level NCORD Committee – ba la khlieh da ki District Magistrate.
