Puducherry, Naitung:
U Myntri ka sorkar kmie uba dei khmih ïa ka tnat Coal and Mines u G Kishan Reddy u la ong ba ki nongïalam jong ka seng BJP ha ka ri ki la rai ban kin pynbeit ryntih ïa ki rukom pyntreikam hapoh ka seng bad ban wanrah ïa ki jingïasngewthuh jingmut hapoh ka seng ha Puducherry bad ban wer ïa ki nongbud jong ka seng ba kin trei shitom bad ïatreilang na ka bynta ban wanrah ïa ka jingjop ha ka jingïakhun ïa ka ilekshon 2026.
U Kishan, ha ryngkat u nongpynïaid jong ka seng BJP ha ka jylla, u Nirmal Kumar Surana bad u Myntri ba dei khmih ïa ka tnat ki kam pohïing jong ka jylla bad u dkhot jong ka National Executive Committee u A Namassivayam, u la long u nongpynïaid ïa ka jingïalang jong ka seng, kaba la pynlong ha kawei ka Hall jong ki riewshimet ha ka sngi U Blei, hapoh ka jingïalam jong u President ka seng ha ka jylla u MP S Selvaganabathy.
Ha kane ka jingïalang la wanrah ïa ka jingmynjurlang ha kaba ki la ai ka jingïaroh ïa u Narendra Modi uba la shimti ïa ka kam kum u nongïalam ka ri ha ka sien kaba lai, da kaba ai khublei ïa ki nongthep vote, bad da kubur ruh ïa ka jingpyntreikam jong ka sorkar kmie ïa ki ain ba pyrshah halor ki kam beaiñ. Ha kaba ïadei bad kane ka rai, la ai khublei ruh ïa ka President jong ka ri ka Droupadi Murmu na ka bynta ka jingkren jong ka hapoh Parliament.
Kum shi bynta ban pynpaw ïa ka jingsngewhun jong ka seng halor ka samoi treikam ha ka sien kaba lai jong u Modi, u Kishan Reddy u la ong, “Ka jingtrei shitom, ka jingaiti, bad ka jingïeid ri jong u Modi, ryngkat bad ka jingpyrshang ba khlem sangeh jong ki nongtrei jong ngi ha ka ilekshon, ki long ki daw na ka bynta ban wanrah ïa ka jingjop.”
U la pynpaw ïa ka jinglah treikam jong ka seng ha ka por ba don ka ilekshon Assembly ha u snem 2021, ha kaba ki la ïakhun haduh khyndai tylli ki konstitwensi, bad ha ka ilekshon Lok Sabha, ha kaba ki la ïoh jingkyrshan haduh lai lak vote, ha kaba, u la ong, kane ka dei ka jingsdang kaba ai jingkyrmen bad ka pyni ïa ka jingkiew kaba khraw haduh katta katta. U Myntri u la pyni ïa ki daw bad pynshong nongrim halor ka jingshah rem jong ka seng Congress ha ka ilekshon halor ka jingsynshar jong ka jait ka kynja pateng la pateng ha ka kam saiñ pyrthei, da kaba ong ba u Modi u ju ïeng pyrshah halor kane.
“Wat lada ka la don ka jingpynphriang lamler jong ka Congress pyrshah ïa ka seng, ngi la ïoh ïa ka jingjop. Ka seng Congress ka la pynrem ïa ka niam Hindu bad ka Sanatana, bad ka la pyrshang ban ïalam bad pynsngewthuh bakla ïa ki nongthep vote kiba na ka kynhun ki Scheduled Castes da ki jingpynphriang ïa ki khubor lamler halor ka jingweng noh ïa ka Constitutional Law bad ka Reservation,” u la ïathuh shuh shuh.U Kishan u la kyntu ïa ki nongbud bad ki nongïalam ka seng ba kin pynjur ïa ka jingïalap ilekshon ha ki Social Media da kaba pynpaw pyrshah ïa ka “jingdon bynta ha kam saiñ pyrthei hapoh ka longïing bad ki kam sniew ba bun jait” jong ka Congress, namar ba ka ilekshon Assembly ka ban sa long ha ki ar snem ban wan.
