Chennai, Nailur:
U Myntri Rangbah ka Tamil Nadu, u C Joseph Vijay, u la pyllait paidbah ïa ka jingpynïar ïa ka skhim jingbam step jong ka Perunthalaivar Kamarajar, na ka bynta ki khynnah kiba pule ha ka klas VI haduh VIII.
Ïa kane ka skhim la sdang ha kawei ka skul pdeng jong ka sorkar kaba don ha Gandhi Gramam, Thiruvanmiyur, ha kaba u Vijay u la ai jingbam step ïa ki khynnah skul bad u la ïadon lang bad ki ha ka jingbam ja. Hadien kata u la leit jngoh ïa ki kamra klas bad ïakynduh bad ki khynnah skul.
Katkum ka jingong jong ki heh sorkar, kumba 15.30 lak ngut ki samla pule kiba pule ha ki 15,454 tylli ki skul ba la ïarap da ka sorkar bad ka sorkar jylla kin ïoh jingmyntoi na kane ka skhim ba la pynheh bad pynïar.
Kum ka jingnam kyrteng ha ka kyrteng jong u Myntri Rangbah barim u K Kamaraj, kane ka skhim ka thmu ban pynbha ïa ka jingbam jong ki khynnah skul bad ban pynthikna ba kin sdang ïa ka sngi long skul jong ki da ka jingbam kaba tei met.
La mang pisa shuh shuh T.217.63 klur ha une u snem mang tyngka ba mynta na ka bynta ban pynheh, kaba la pynlong ïa ka mang tyngka baroh jong ka prokram ban poi sha ka T.724 klur.
Ïa ka jingpynheh la thmu nyngkong ha ka 17 tarik u Nailur, hynrei la pynjlan noh khnang ka jingleit jngoh jong u Vijay kaba dang shen sha London.
Ïa kane ka skhim yn ym pyntreikam ha ki distrik Chengalpattu bad Tiruppur ïa mynta namar ka Model Code of Conduct jong ka Election Commission kaba treikam na ka bynta ka elekshon shiteng samoi ha ka 6 tarik u Risaw ha ki Assembly konstitwensi jong ka Madurantakam bad Dharapuram.
Ka jingbam step ka kynthup ïa ki jingbam ba tei met kum ka upma, ka kichadi bad ka pongal, ha kaba ki jingbam ba la shna na u kew la kynthup arsien ha ka shi taïew.
Ha Chennai, ka Greater Chennai Corporation kan pyntreikam ïa kane ka skhim lyngba ki ‘Integrated Kitchen’ kiba shakri ïa ki 447 tylli ki skul sorkar bad ki skul ba la ai jingïarap.
Ka Directorate of Municipal Administration kan peit ïa kane ka prokram ha ki 2,150 tylli ki skul sorkar bad ki skul ba la ïarap ha kiwei pat ki korporashon, ki Municipal bad ki jaka ba marjan jong ki shnong.
Ka Tamil Nadu Women’s Development Corporation kan pyntreikam ïa ka ha ki 12,857 tylli ki skul sorkar bad ki skul ba la ai jingïarap ha ki nongkyndong, bad ki jaka ba marjan.
Katkum ka jingpynbna paidbah, ki dkhot jong ki kynhun ïarap ïalade kin pynkhreh bad ai ïa ka jingbam step ha ki skul bapher bapher.
Kane ka jingleh jong ka sorkar na ka bynta ban pynbiang ka jingbam step na ka bynta ki khynnah skul, ka ai jingkyrmen na ka bynta ban kyntiew ïa ka roi ka par ha ka jylla khamtam ka jingshngaiñ na ka bynta ka lawei jong ki khynnah skul.
Ka jingpynheh ka long ban pynkhlaiñ ïa ka jingpule skul da kaba pynïadei ïa ka jingbam bad ka koit ka khiah bad ka jingleit skul bad ka jingpule jong ki khynnah skul.
