Bhubaneswar, Nailur:
Ka sorkar jong ka jylla Odisha ka la sdang ban sam ïa ki kot pule ba la pynkylla thymmai sha ki khynnah skul ha ka kyrdan barit hadien ba la pynbeit ïa ki jingdonkam, la ïathuh ka tnad School and Mass Education (SME) ha ka lah sngi U Blei.
Ki heh ka tnad ki la ïathuh ba ka rukom sam ïa ki kot pule ba la pynthymmai sha ki khynnah klas I haduh VIII ha ka Elementary level ka la sdang ha Cuttack bad kiwei kiwei ki distrik bad yn sa pyndep noh shen. Kane ka jingpynbna ka long ha ka por ba ka Naba Nirman Yuva Chhatra Sangathan (NYCS) ka dang pynjur ïa ka ‘Satyagraha’ kaba dang ïaid shakhmat halor kane ka kam ban pan jinghiar shuki ïa u Myntri ka SME u Nityananda Gond.
Ka Cockroach Janta Party (CJP) ruh ka la ai ka jingkyrshan ïa kane ka jingïakhih.
U nongïalam bad nongkren jong ka CJP, u Saurav Das, u la ïasoh bad ka jingïakhih jong ka NYCS ha kane ka sngi ban pan jingkitkhlieh na u Myntri halor ki kot pule kiba la dap da ki jingbakla.
U Das u la leit jngoh ruh ïa ki katto katne ki skul ha Khurda kum shi bynta jong ka jingïakhih jong ka seng ‘Skul Thik Karo’.
