Chennai, Nailur:
U Myntri ka tnad Energy bad Law u C T R Nirmal Kumar u la plie paidbah ïa ka skhim ai jingïarap ka Tamil Nadu Rooftop Solar Subsidy bad ka Rooftop Solar Portal kaba thymmai ha ka jaka treikam jong ka Tamil Nadu Electricity Board (TNEB) ha ka lah sngi U Blei, bad pynbna ïa ka thong ban pyndap ïa ka shi lak tylli ki ïing ha u bnai Lber 2027.
Hapoh kane ka skhim, ki nongthied kiba dei hok ban ïoh ïa ka jingïarap jong ka sorkar pdeng naduh ka 5 tarik u Nailar, 2026, kin ïoh ïa ka jingïarap ba la pyndap na ka sorkar jylla. Ka jingïarap lang kan long T. 35,000 na ka bynta ki Rooftop Solar System haduh 1 kW, T. 70,000 na ka bynta ki system haduh 2 kW bad haduh T. 1 lak na ka bynta ki system haduh 3 kW.
U la ong, “Shisien ba la ai ram ïa ka jingïarap jong ka sorkar pdeng, ka State Portal kan pyntreikam hi dalade bad pyllait noh ïa ka jingïarap jong ka sorkar jylla kaba la bynrap. Ki nongthied kin ym donkam ban aiti ïa ka aplikeshon ba kyrpang.”
U Myntri Rangbah ka jylla u C Joseph Vijay ha ka 5 tarik u Nailar, u la pynbna ba ka jylla ka la mang T.50 klur ha une u snem mang tyngka na ka bynta kane ka subsidy. “Lada ka jingdawa ka palat ïa ka thong, yn wad pisa shuh shuh bad ka jingkyrshan subsidy da ka jingmynjur jong u Myntri Rangbah”, la ong u Myntri.
Ka portal kaba dang shu plie thymmai kan ai jingtip shaphang ki skhim Rooftop Solar, ki jingïarap pisa na ka sorkar pdeng bad ka sorkar jylla, ki rukom buh, ka jinglong jingman jong ka jingaplai bad ki tnad pyndonkam bording na ki bor jong ka sngi ba la buh ha ka Solar Empanel. Kan pynïasoh ruh ïa ki rukom treikam kiba ïadei bad ki aplikeshon, ka jingbuh ïa ka solar bad ka jingpynïasoh ïa ki meter, la batai u Myntri.
U Myntri u la ong ba ïa ka jingpynslem ban buh Meter yn buddien ruh lyngba ka rukom treikam ba la pynïasoh lang. Kam don kano kano ka jingduna ki meter, u la ong bad bynrap ba ki nongpyndonkam ki lah ban buddien ïa ka jinglong jingman jong ki aplikeshon ha ka portal ba thymmai (tnebltd.gov.in).
Hynrei ka jingpyntreikam ïa kane ka skhim ha ka Dharapuram jong ka Tiruppur district bad ka Madurantakam Assembly konstitwensi jong ka Tiruppur distrik kan sahkut tad haduh ban da weng noh ïa ka Model Code of Conduct ba la pynjari na ka bynta ka elekshon shiteng samoi ha ka 6 tarik u Risaw.
