Bengaluru, Naitung:
Kumba la khmih bniah, u Myntri Rangbah jong ka Karnataka u Siddaramaiah u la ong, “ka sorkar jylla ka lah ban pyllait 8,000 cusec ka um sha Tamil Nadu man ka sngi haduh ban da kut u bnai, bad ym 1 tmcft (11,000 cusec) kumba la hukum da ka Cauvery Water Regulation Committee (CWRC). Ngi la shah bthah ban pyllait ïa ka um kaba 1 tmcft tang lada don ka jinghap slap kaba jur. Ïa kane la ai jingmut da ka kynhun ki nongïasaid aiñ jong ngi. Ki la ai jingmut ïa ngi ba lymda kumta, ka komiti kan sngew ba ngi long kiba skhem.”
“Ngi la pynlong jingïalang ha ka 12 tarik Naitung bad ngi la rai ban nym pyllait um shuh. Ngi la shim ruh ïa ka rai ban khot bad ïalumlang bad baroh ki seng ban buh ka jingkyrpad hakhmat ka Cauvery Water Management Authority (CWMA). Ngim lah ban pyllait da 1 tmcft ka um namar ba ka don tang 63% na ki jaka pyllang um jong ngi ha Cauvery Basin,” u la ong.
“Ha kine ki khyndiat sngi ba la leit, la pyllait ïa ka um kaba 20,000 bad 19,000 cusec. Dang ha ka sngi U Blei, la pyllait 13,000 cusec ka um. La pyllait tang ïa ka um kaba tam khnang ba kan ym buh jingma ïa ka jaka pyllang um”, u la ong.
Ha ka Sngi Palei mynshem taïew, ka CWRC ka la hukum ïa ka Karnataka ban pyllait 20 tmcft ka um sha Tamil Nadu, ha ka dor jong 1 tmcft ha ka shi sngi haduh ban da kut u bnai.
Ha kiwei kiwei pat ki snem, ka Karnataka ka hap ban pyllait um haduh 9.4 tmcft ha u bnai jylliew bad 31.24 tmcft ha u Naitung, kaba long baroh 40.43 tmcft.
Haduh mynta la pyllait ïa palat 5 tmcft. Ki riew shemphang halor kane ka bynta ki la maham ïa ka sorkar jylla ba ka lah ban mad jingeh na ki ar tylli ki jaka pyllang um jong ka wah Cauvery lada ym pyllait ïa ka um.
