New Delhi, Nailar:
Ka Supreme Court ha ka rai ba ka la dep ban ai, ka la ong ba kan bishar ha u bnai Nailur ha kaba ïadei bad ka jingkyrpad jong ka sorkar West Bengal bad kiwei kiwei kiba tuklar ïa ka hukum jong ka Calcutta High Court kaba la pynduh pyndam noh ïa ka jingthung kam ïa ki 25,753 ngut nonghikai bad ki nongtrei bym dei ki nonghikai ha ki skul sorkar bad kiwei pat ki skul ba la shah ithuh ha ka sorkar jylla.
Ka kynhun jong ki nongbishar ba la khlieh da u Chief Justice DY Chandrachud ka la ai por ïa ki arliang mamla ba kin phah ïa ki jingkyrpad jong ki halor ki dorkhas hapoh ka 16 tarik u Nailar.”Ka por ban phah ïa ki jingthoh na ka bynta ki nongmudui ha ka kynhun jong ka West Bengal halor kine ki mat yn pynjlan haduh ka Sngi Thohdieng,” la ong u Chief Justice Chandrachud.Ka kynhun jong ki nongbishar kaba kynthup ruh ïa u Justice JB Pardiwala bad u Justice Manoj Misra, ka la bthah ïa u Nodal Counsel ba un pynkhreh lang ïa ki rekod ha ka dur ilektronik bad ban pynthikna ba ki jingbishar ba la kdew da ki arliang mamla ki dei shi bynta jong kawei ka thup jong ki kot ki sla ne ki jingthoh jong ka PDF.
Ka ïingbishar kaba la dep ban bishar bniah halor 33 tylli ki jingmudui ha ka High Court ha ka 22 tarik, Ïaïong ha kaba ïadei bad kane ka bynta, mynta ka la buh ïa ka rai ban bishar bniah biang halor jong ka ha u bnai Nailar. Ha ka 16 tarik, Naitung, ka la ai ïa ka lad kaba khatduh ban ai ïa ki jubab sha ki jingkyrpad ba pynibor pyrshah halor ka hukum jong ka High Court.
Ki jingkyrpad kiba tuklar ïa katei ka hukum ki kynthup ruh ïa kaba la mudui da ka sorkar West Bengal. Ka kynhun jong ki nongbishar ka la ïoh jingtip ba ïa ki jubab ha ryngkat ki sakhi ym shym la phah da kiba bun ki liang. Ka sorkar West Bengal ruh kam shym la ai ïa ka jubab jong ka ha ki mukotduma ba ka la shah mudui.
Ka ïing bishar ka la pynmih ruh ïa shibun ki jingbthah ha ka rukom treikam bad ka la thung ïa saw ngut ki nongïasaid aiñ kum ki Nodal Counsel katba ka dang bthah ïa ki ban phah ïa ka jingthoh ba ïadei lang ha ka dur ilektronik hadien ba ki la ïoh ïa ki jingtip ba bniah na ki nongïasaid aiñ jong ki kynhun bapher bapher.
Ka la thung ïa ki nongïasaid aiñ kiba kynthup ïa ka Astha Sharma, kaba mihkhmat ïa ka sorkar jylla bad ïa ka Shalini Kaul, ka Partha Chatterjee bad u Shekhar Kumar kum ki Nodal Counsel. Hynrei ka ïingbishar ka la ailad ruh ïa ka kynhun Central Bureau of Investigation (CBI) ban bteng ïa ka jingtohkit jong ka bad ka la ong ba ka lah ruh ban tohkit ïa ki dkhot jong ka kynhun Myntri jong ka jylla, lada donkam.
Nalor ba la weng noh ïa ki kam thungkam, ka ïing bishar ka la bthah ruh ïa ka CBI ban tohkit halor kane ka rukom thungkam bad ban aiti ïa ka kaiphod hadien lai bnai.
Ki la don palat 23 lak ngut ki nongwadkam kiba la ïakhun ïa ka State Level Selection Test (SLST)-2016 na ka bynta 24,640 tylli ki kam ba lait. La pynmih haduh 25,753 tylli ki shithi thungkam pyrshah ïa ki 24,640 tylli ki kam ba lait.
Ka High Court ka la bthah ïa kito kiba la thung shabar jong ki 24,640 tylli ki kam ba lait kiba lah ban ïoh da ka sorkar, kiba la thung hadien ba la kut ka tarik ba la buh da ka sorkar, bad kito kiba la aiti ïa ki Blank OMR Sheet hynrei ki ïoh ïa ki kam ba ki dei ban pynphai ïa baroh ki jingsiew bad ki jingmyntoi baroh ba ki la ïoh.
