Shillong, Nailar 16
Ka Shillong Lajong FC kan pynkhreh ïa ka jingïalehkai kaba khatduh jong ka Group-F ha ka lympung ïalehkai 133rd Durand Cup pyrshah ïa ka FC Goa ha ka Sngi Saitjaiñ ha ka por 7 baje janmiet ha JN Stadium, Polo.
Ka Lajong hapoh ka jingïalam u Jose Carlos Rodriguez Hevia (coach) ka donkam ban jop pyrshah ïa katei ka kynhun ialehkai Indian Super League na ka bynta ban pynthikna ban ïoh rung sha ka quarter final.
Kumba haduh kaba kut jong ar tylli ki wat jingïa-khun, kine ki kynhun ki dang ïoh mar 6 point, hynrei ka Lajong ka dang dei ka kynhun kaba lamkhmat ha kane ka group ha kaba ka la tam lyngba ka ‘goal difference’ ïa ka FC Goa. Katba ka Tribhuwan Army Club (3 point) na Nepal lem bad ka Rangdajied United ki la wan ha ka kyrdan balai bad basaw.
Kumba ka long mynta 6 tylli ki kynhun ki ban wan ha ki kyrdan ba hakhlieh jong kawei-pa kawei ka group kin ïoh rung sha ka quarter final bad kynthup ruh sa ar tylli ki kynhun kiba kham kynsai ki ban shah jied lang. Kumta ka Lajong bad ka FC Goa ki don jingkyrmen ban ïoh rung lang lada jia ba ki ïakhaid ha kane ka jingiakhun kaba khatduh, hynrei kin hap ban ïaknieh pat bad kiwei ki kynhun kiba don na ki saw tylli ki group namar kine ruh ki ïaryngkat ha ka jingïoh point.
Ha ka Group-A, ka Mohun Bagan bad ka East Bengal ki don mar 6 point, kumjuh ha ka Group-B ka Bengaluru FC ka la thikna ba ka la rung sha ka quarter final hadien ba ka la ïoh 9 point bad ka Mohamme-dan kaba wan ba-ar ka la kamai 4 point. Ha ka Group-C ka Kerala Blas-ters bad ka Punjab FC ki don mar 7 point. Ha ka Group-D ka Jamshedpur FC bad ka Army Red ki don mar 6 point. Ha ka Group-E ka Northeast United FC ka la bat ïa ka kyrdan ba hakhlieh da kaba ïoh 9 point hadien ka jingjop ïa ka Odisha da 5-1 kol hynne ka sngi.
Kum ban shu kdew, ka Lajong ka la lah ban pynliem nyngkong ïa ka Tribhuwan Army da 1-0 kol bad hadien ka la jop da 2-0 kol ïa ka Rangdajied. Katba ka FC Goa ka la jop nyngkong ïa ka Rangdajied da 4-3 kol bad hadien ka la jop ïa ka Tribhuwan Army da 2-1 kol.
