Mumbai, Nailar:
Ki sorkar kiba hapoh ka jingïalam jong ka seng Congress kiba hashwa, ki la pynleit jingmut ha ki kam saiñ pyrthei da kaba kim ailad bad pdiang kum ki nongshong shnong ïa ki phetwir kiba wan na ki ri ba marjan hynrei ki ailad ïa ki “nongwan buhai shnong” sha India, la ong u Myntri ka tnat ki kam pohïing ka sorkar kmie u Amit Shah ha kaba u la ai ïa ka jinglong nongshong shnong ka ri ïa ki 188 ngut ki phetwir kiba dei ki riewngeit Hindu na Pakistan hapoh ka jingtreikam jong ka Citizenship (Amend ) Act (CAA) ha Ahmedabad ha ka sngi U Blei.
Kum shi bynta ban ai jingïaroh ïa ka CAA kum ka lad ban ai ïa ka hok sha ki lak ngut ki phetwir kiba sah ha India bad ban ym knieh noh ïa ka jinglong nongshong shnong jong ki rit paid, u la bynrap da kaba ong ba ki aiñ ki dei na ka bynta ki paidbah ym ban ym ai jingbit ïa ki.
“Ha kawei ka liang, phi la ailad ïa ka jingwan rung kyrthep ki bar ri na ki khappud, phi la ailad ïa ki klur ngut ki nongwan rungtuh bad ïoh ïa ka jinglong nongshong shnong kaba long beaiñ. Ha kawei pat ka liang, phi la ïathuh ha kito kiba bud ïa ka aiñ, kiba ai ïa phi ïa ka aplikeshon ban ïoh long nongshong shnong ba kam don kum kata ka jingpynïoh ïa ka hok katkum ka aiñ. Ka aiñ ka dei na ka bynta u paidbah, ki briew kim dei na ka bynta ka aiñ”, u la ong.
“Ha ki por ba mynshuwa, kito kiba phet rieh sha India hapdeng u snem 1947 bad 2014 kim shym la ïoh ïa kane ka hok (jinglong nongshong shnong) bad ïa ka hok ym shym la leh da ki sorkar ba ïalam da ka Congress bad ki seng ba la ïatreilang jong ka namar ka rukom pyntreikam ka long ban kyntait na ka bynta ban pynduh ïa ka hok kiwei. Kumba la sakhi la ong ba la ju pynshitom ïa ki ha ki ri bamarjan namar ba ki dei ki Hindu, ki Jain, ki Buddhist ne ki Sikh, hynrei ka jingpynshitom jong ki ka ïai bteng ha ka ri jong ngi. Ki la kwah eh ïa ka hok haduh lai pateng, hynrei kane ka rukom pyntreikam jong ka jingïatreilang ka INDI kam shym la ai ïa ka hok ïa kita ki phetwir. U nongïalam ka BJP u Myntri Rangbahduh u Narendra Modi u la ai ka jingbishar hok ïa ki,” la bynrap u Shah.
