Srinagar, Nailar:
Tang hadien khyndiat bnai ba la ïohmad ïa ka shongsuk-shongsaiñ ki la mih kynsan kynsan ki kam pyntriem jong ki lehnoh ha Jammu & Kashmir. Kumba la sakhi, la ong ba ha u bnai Naitung, ki la don 8 tylli ki jingïasiat ba markylliang, lai tylli ki jingshah thombor kynthup ïa ka jingthombor jong ka kynhun BAT bajur tam ïa ki shipai ïada khappud bad lai tylli ki jingpyrshang rungtuh jong ki bar ri kiba la jia ha J&K. Ki la don kumba 14 ngut ki shipai pahara bad 13 ngut ki lehnoh ki la ïap ha ka jingïasiat kaba markylliang. U bnai Naitung kumba la sakhi, u la long u bnai uba la mih ki jingïasiat kiba bun hapdeng ki lehnoh ba ki shipai ïada ri ha baroh ar, kata ha Kashmir bad ha Jammu.
Ki la don 8 tylli ki jingïasiat kiba la jia ha u bnai Naitung bad lai tylli ki la jia ha Kashmir bad saw tylli ha ka thaiñ Jammu, lai tylli na kine ki dei kiba la jia tang ha ki lum Doda distrik. Hadien kiba bun ki jingïasiat kiba markylliang hapdeng ki lehnoh bad ki shipai ïada ri ki la jia ha ki thaiñ ba long khlaw jong ka Doda, ki bor pahara ki la pynlong ïa ka jingkhynra bad jingwad kaba jur bha ha ki jaka khlaw barben bad buddien ïa ka kynhun jong ki 10-12 ngut ki lehnoh, kiba la ïaphiah ha ka kynhun jong 2 haduh 3 ngut.
Ha u bnai Naitung, ki la don lai tylli ki jingjia shah thombor kiba jur bad shyrkhei bha, kawei ka dei kaba la jia ha ki jaka khlaw Madeshi jong ka distrik Kathua ha kaba ki la don kumba 5 ngut ki shipai kiba la shah pynïap. Kawei pat ka jinghiar thma jong ki lehnoh ka la jia ha ka ïingsah jong u dkhot ka VDC u Purshottam Kumar uba ïoh pdiang ïa ka khusnam Shaura chakra ha kawei ka shnong kaba kyndong kaba don ha Rajouri. Ha kane ka jingshah thombor ha ki lehnoh, uwei u shipai bad u bahaïing jong u dkhot jong ka VDC ki la shah pynmynsaw.
Ki lehnoh ha baroh kine ki jingjia ki la ïohlad ban phet krad man haba ki la dep ban leh ïa ki kam pyntriem jong ki. Ka jinghiar thma kaba lai ka dei pyrshah ïa ka jaka treikam jong ki shipai India kaba don hajan u Line of Control (LoC) ha Machil Sector jong ka north Kashmir da ka kynhun BAT kaba pawnam bha. Kane ka kynhun BAT ka kynthup ïa ki commando jong ka Pakistan bad ki lehnoh kiba la shah pyntbit bha. Ha kane ka jinghiar thma ka BAT, uwei u shipai bad uwei uba wan rungtuh sha ka ri na Pakistan ki la shah pynïap. Ki la don kumba lai tylli ki jingpyrshang rungtuh jong ki lehnoh kiba la jia hapoh ubnai Naitung. Ar tylli na kine ki jingpyrshang ki la jia ha ka bynta jong ka Keran ha ka thaiñ Shatei-lam-mihngi jong ka Kashmir katba kawei pat ka jingpyrshang ban rungtuh ka la jia ha ka bynta jong ka Poonch Sector jong ka Jammu. Ïa kine baroh lai tylli ki jingpyrshang rungtuh la lah ban khanglad da ki shipai ïada khappud.
Katkum ki jingïohlum jingtip, ha ki jingïasiat ba markylliang, ki jingïaleh ban jingpynibor ha ka por ba la don ki jingpyrshang rungtuh ki bar ri, ki la don kumba 14 ngut ki shipai kiba la ïap. Napdeng kine ki shipai kiba la shah pynïap ki dei uwei u Captain bad u Junior Commissioned Officer (JCO). Na ki 14 ngut ki shipai kiba la ïap, 10 ngut ki dei kiba la ïap ha ki kam shah thombor jong ki lehnoh ha ka thain Jammu bad saw ngut ha them ka Kashmir. Shuh shuh la ïathuh ba ki la don ruh 13 ngut ki lehnoh kiba la kyllon ïap ha ka jingïaisat bad ki shipai ïada ri. Kine baroh ki la shah pyniap ha ki jaka ba marjan bad ha ki bynta jong u LoC.
