Shillong, Nailar 27
Ka Pomlakrai SC bad ka Mawpat SC ki la khur ïa ka jingjop ha ka lympung ïalehkai SSA Third Division Football League 2024 ha ka sngi Ba-ar ha SSA Stadium kaba ha First Ground, Polo.
Ha ka jingïakhun kaba nyngkong, ka Pomlakrai ka la pynliem noh ïa ka Nongmensong SC lyngba ka shi kol lyngba u Edawanmi Wahlang ha ka minit kaba 20.
Haba phai shah kawei pat ka jingïakhun kaba ar, ka Mawpat SC ka la pynliem noh ïa ka Lumparing SC da 3-1 kol. Ka Lumparing ka la pynkhih jar nyngkong eh ha ka minit kaba 15 lyngba ka jingïarap pynthep da u rangïalehkai ka liang pyrshah u Danial Shadap. Hynrei hadien shiteng kynta ka Mawpat ka la lah ban pynïakhaid kylla lyngba u Everson Malieh ha ka minit kaba 34. Kane ka kynhun ka la pynbud biang sa ar kol lyngba u Dikorta Nongrum ha ka minit kab 57 & 81 na ka bynta ban khur syndon ïa ka jingjop.
Kane ka lympung kan bteng biang ha ka sngi Balang ha kaba ka Krang SC kan ïakhun pyrshah ïa ka Ïaityllilang SC ha ka minit kaba 12:45, katba ka Umpling SC ïa ka Lumdiengjri SC.
