Khliehriat, Nailar 28
Ka lympung ïalehkai Second Division Football Tournament ba la pynïaid da ka East Jaiñtia Hills District Football Association (EJHDFA) ka la nangjam shaphrang ha madan Artificial Turf kaba ha Deinshynrum, Khliehriat ha ka sngi Balang ha kaba baroh ar tylli ki jingïakhun ki la kut ha ka jingïakhaid.
Ha ka jingïalehkai kaba nyngkong ka SWO Moosianglamare Old SC bad ka Umlyngsha Youth SSC ki la ïasam mar shi point hadien ba kim shym la lah ban pynkhih jar haduh kaba kut ka jingïalehkai bad kine ki kynhun ki la ïoh mar kawei ka red card.
Ha ka jingïalehkai kaba bud hapdeng ka Rymbai Pohskur SC bad ka Ïongkaluh SCSC ki la kut ha ka jingïakhaid da mar 1-1 kol. Ïa ka kol jong ka Rymbai Pohskur la thep da u Lamphrang Dkhar ha ka minit kaba 65 bad na ka bynta ka kol jong ka Ïongkaluh SCSC la thep da u Ricky Kyndait ha ka minit kaba 54.
