Jowai, Nailar 29
Ka lympung ïalehkai 2nd Division Football Tournament-7th Debo Shullai Memorial Trophy ba la pynïaid da ka West Jaiñtia District Sports Association (WJDSA) ka la nangjam shaphrang ha madan Kiang Nangbah Stadium, Jowai.
Ha ka jingïalehkai kaba la long haka sngi Palei, ka Luti Tuber Ialong bad ka Risingsun Mukhla ki la ïasam mar shi point hadien ba ki la ïakhaid mar 1-1 kol. Ïa ka kol jong ka Luti Tuber Ïalong la thep da u Marbhah Dhar ha ka minit kaba 24, hynrei ka Risingsun Mukhla ka la lah ban pynphai kylla lyngba u Stopper Bang ha ka minit kaba 49.
Ha ka jingïalehkai kaba bud, ka Ïawmulong Nartiang ka la pynliem noh ïa ka Shangpung Khliehmushut da 1-0 bad ïa kane ka kol la thep da Living Suja ha ka minit kaba 13.
Na ka liang ki bor pynïaid ki la pynbna ba ka jingïakhun quarter final jong ka lympung ïalehkai 3rd Division Football Tournament-4th Adelbert Laloo Memorial Trophy kan long ha ka sngi Thohdieng hapdeng ka Riatsaliya pyrshah ïa ka Newhill ha ka por 12:30 mynsngi. Ka Lumpyrtuh Mihmyntdu ïa ka SCSC Nonglatem ha ka por 2 baje nohphai sngi.
