Mawkyrwat, Nailar 30
Ka Nonglang Sport Club kum shibynta ka jingrakhe ïa ka jingdap 50 snem jong ka Sport Club ne ka Jubili Ksiar kan sa pynlong ïa ka Golden Jubilee Football Tournament 2024 ha madan Nonglang Pynden ïew Lyngdoh ha South West Khasi Hills District.
Na ka liang u Bah Kordorlin Lyngdoh, Secretary Nonglang Sport Club u la ïathuh ba ka khusnam baroh ha katei ka lympung kan long T.2 lak ha kaba ka nongjop kan ïoh ïa ka song pisa kaba T.1.30 lak ryngkat ka trophy bad T.70 hajar ïa kaba wan ba ar bad kumba long mynta ka jingpynbha bad pynheh ïa ka madan ruh ka la ïaid shaid shaid na ka bynta ban pynlong ïa katei ka lympung.
Shuh shuh u Bah Kordorlin Lyngdoh u la ïathuh ruh ba ka sport club ka la sdang ïa kane ka jingrakhe Jubili Ksiar naduh u snem 2023 bad ïoh ban pynkut ha u snem 2025 bad ha kine ki jingpynkhreh, ka sport club ka la ïoh ban pynlong ïa shibun ki lympung ïalehkai bapher bapher naduh ka Football, Basketball, Badminton, Volley Ball, Archery, Cricket, Arm Wrestling bad kiwei kiwei ïa kaba la wan ban ïashimbynta shitrhem naduh ki samla kynthei shynrang ki heprit bad ki rangbah.
U la ïathuh ruh ba ka Sport Club kum ka dak ka jingleh kmen ïa ka jingkynjoh ïa u mawmer 50 snem ka la thaw ïa ki tnat komiti bapher bapher na ka bynta ban pynïaid shakhmat bad pynlong biang ïa ki jait jinglehkai bapher bapher hapoh ka shnong bad ha ka 29 tarik u Nailar 2024 ka la ïoh ban plie pyrda biang ïa ka Inter Dong Football Tournament ïa kaba la wan plie pyrda da u Bah Baristar Thyrniang ha ryngkat ka jingdonlang u Myntri Shnong Bah F Kharraswai, ki riew rangbah bad kiwei kiwei.
Kumta na ka liang ka Nonglang SC ka khot ka wer ïa ki kynhun bad ki sport club bapher bapher jong ka Ri Khasi bad Jaintia ba kin wan ban ïashim bynta bad lehkmen lang bad ka sport Club ha katei ka lympung ka ban sa sdang ha u taiew ba khatduh jong u bnai Nailar lane taïew ba nyngkong jong u bnai Nailur.
