Nongstoiñ, Nailar 30
Ka Kyrsiewthiah FC bad ka Shidus FT ki la ïoh khur jingjop ha ka sngi sdang bad plie pyrda ïa ka lympung ïalehkai phutbol ka 1st Knock-Out Open To All Football Tournament 2024 ba la pynlong da ka Iatreilang Groups, Nongsohpian West Khasi Hills ha ka sngi Thohdieng.
Haba phai sha katei ka sngi plie, ka jingjop bad ka nam tam jong ka Kyrsiewthiah SC kala wan hadien ba kala pynliem noh da 5-3 kol ïa ka Byllon WT ha ka jingïalehkai pyrshah kaba la long ha madan shnong Nongsohpian.
Ka nam jop jong ka Shidus FT pat ka la wan hadien ba kala pynliem noh da 6-2 kol ïa ka Comeback United ha ka jingïalehkai pyrshah.
Ha katei ka sngi plie pyrda, u samla Lumlang Kharsyiemlieh, President ka HYC West Khasi Hills u la long u kongsan, ha ka jingdonlang u Sordar ka shnong Nongsohpian u Bah Sirian Wahlang, ki riew rangbah ka shnong, ki dkhot jong ka Iatreilang Groups, bad kiwei kiwei.
Lah ban kdew ba ha katei ka lympung ki don 32 tylli ki kynhun na kylleng ki jaka ka thaiñ Nongstoin kiba la wan ban ïashim bynta bad ka khusnam kan long da ka song pisa bad ka trophy.
