Shillong, Nailur 01
Uwei na ki rangheh ksah ka Jylla u Bah Donbor M. Rumnong u la khur ïa ka nam lahduh ne overall champion ha ka WFF Asia Pacific Championship 2024 kaba la long ha ka sngi U Blei ha nongbah Manila kaba ha Philippi.
Une u rangïalehkai na Mawlai Nongmali, Shillong u la long tang marwei ban mihkhmat napoh ka Jylla bad u la lah ban pynpaw ïa ka jingtbit na ka bynta ban long kum uwei napdeng ki nongïalehkai kiba kynsai ha katei ka rynsan.
Lah ban kynmaw ba u Donbor uba la kilanmet la bun snem hapoh ka Body Zoo kaba ha Qualapatty, Shillong, u la khur ïa ka takma rnong ha ka WFF PRO-AM Asia Pacific Championship 2022 ba la pynlong da ka World Fitness Federation (WFF) ha Vietnam.
Lah ban pynkynmaw ba u Bah Rumnong u la lah ban khur ruh ïa ka nam lahduh ha ka Mr India 2019 (Men’s Physique).
