Dhaka, Nailar:
Ka sorkar ba shipor jong ka Bangladesh, ha ka Sngi Palei, ka la weng noh ïa ka jingïada ba kyrpang naka bynta ka Myntri Rangbahduh barim jong katei ka ri- ka Sheikh Hasina, kaba la shah pynhiar shuki noh dang shen, ha kaba katei ka sorkar ba mynta ka la weng lut ia kitei ki jingai jingiada ba kyrpang naka bynta jongka bad kumjuh ruh ia ki bahaïing- hasem jongka ha kane ka por.
Kumta la ong ba ka kynhun ki Myntri nongai jingmut jong ka Sorkar ryngkat bad u Chief Adviser u Professor Muhammad Yunus, ka la rai ban pynkylla noh ia katei ka Special Security Force Act 2021 kaba la weng noh ïa ka jingpahara ba kyrpang na ka bynta ka Myntri Rangbahduh barim jong ka ri- ka Sheikh Hasina bad ki bahaïing hasem jongka baroh.
Shuh shuh la ong ba, hadien ba ka Sheikh Hasina kaba la don 76 snem ka rta ha kane ka por, ka la leit phet rieh noh sha India ha ka 5tarik jong une u Nailar, u President ka Bangladesh, u Moham-mad Shahabu-ddin, u la pynpra noh ia ka Parliament bad la ioh ban thaw noh ia ka sorkar thymmai ba shipor ban pyndep ia ka samoi ba sah jong ka sorkar barim.
Hynrei kaba kham sngew shyrkhei, ka long ba ka Sheikh Hasina, ka sahkut mynta ryngkat ki 75 tylli ki mukotduma ba la leit ban ujor pyrshah ia ka da ki briew bad ki seng paidbah halor ka jingdon kti jongka ha ki jingjia pyniap briew bad ha kiwei de ki kam kiba long palat ia ka aiñ jong katei ka ri.
