Shillong, Nailur 02
U Lat ka Jylla u C. H. Vijayashankar u la pynkup burom ïa ki khynnah ïalehkai jong ka Nongjri Presbyterian Secondary School kaba la lah ban pynurlong na ka bynta ban rah ïa ka nam lahduh ha ka sien kaba nyngkong eh ha ka Under-15 jong ka lympung ïalehkai 63rd Subroto Cup Internatio-nal Football Tournament 2024.
Ïa kane ka jingïalang kaba la pynlong ha ka Lah Sngi U Blei ha Raj Bhavan ha kaba la ïadon lang u Myntri Rangbah ka Jylla u Conrad K. Sangma, kumjuh u Myntri ba dei khmih ïa ka tnat Sports & Youth Affairs u Bah Shakliar Warjri, u MLA/MDC ka Mawhati u Bah Charles Marngar, bad uba dei artad u Chairman ka Managing Committee ka skul nalor kiwei pat.
Ha kane ka sngi, u Lat u la aiti ïa ka cheque kaba T. 1.1 lak , nangta ka syrnot ïa ka skul, u manager bad kumjuh ïa u coach lem bad ki song ai sngewbha.
Haba ai jingkren ha kane ka sngi u Lat ka Jylla kum u kongsan u la ong, “Namar ba nga ruh nga dei u briew uba ïalehkai nga lah ban pynithuh bad kine ki khynnah ïalehkai. Ban jop ha kane ka lympung kaba don burom kam dei kaba suk. Nga ngeit ba ka por kaba bha tam ban nang ïalehkai na ka bynta uno uno u khynnah ka long hapdeng ka rta 6 haduh 16 snem, da kaba pyrkhat ïa kane, ka long shisha kaba ai mynsiem ban ïohi ïa ka jingtbit ha kane ka rta.”
U Lat u la ïaroh ruh ïa ka jingtrei shitom jong ka Sorkar Jylla kaba la kyrshan ïa kane ka kynhun ba kan lah ban khur ïa ka jingjop ha katei ka lympung. Shuh shuh u la kyntu ïa ka Sorkar ba kan bteng ruh ïa ki jingpyrshang ban kyntiew ïa ki kam ïalehkai namar ki samla ki dei kawei na ki jingdon jingem ba kongsan tam jong ka jylla.
Na ka liang u Myntri Rangbah ka jylla, u Conrad K Sangma u la ong, “Kane ka dei ka khyllipmat kaba ktah namar ka dei ka jingleh sbun, sngewrit bad pyrkhat bha jong u Lat ka jylla bad ngam kynmaw ïa uno uno u Lat uba la ai khublei bad ban pynlong ïa ka prokram kaba kyrpang ha ka liang ka jingïalehkai sports bad ngi dei ban ai khublei ïa ka jingshim khia ka jong u.”
Ha kaba ïadei bad ka jingshim khia ka Sorkar ban kyntiew ïa ki kam ïalehkai, u Myntri Rangbah u la ban jur ba ka sorkar ka la bei tyngka shibun eh ha ki jingtei ïa ki jaka ïalehkai kham bun ha kine ki khyndiat snem ba la dep. U la ong ruh ba ka sorkar kaba mynta ka la lah ban pynlong lai na ki san tylli ki Meghalaya Games. Shuh shuh u la ïathuh ruh ba la ai jingïarap pisa ruh ïa ki synjuk ïalehkai bapher bapher ha ki bynta bapher bapher ban pynbha bad pynïaid ïa ki kam ïalehkai.
Ki rangïalehkai kiba la shah pynkup burom ki long u Yeomanly Son Shadap, Ïainehskhem Marboh, Prosperwell Ryntong, Richmond Lapang (kapten), Ïaisynroplang Syiemlieh, Franky Kharkrang, Dasuk Banphrang Diengdoh, Marc R. Marak, Shanbok Basaïamoit, Nang-sanbha Warjri, Banteilang Malieh, Pynshngaiñ Khapew, Samuel Malieh, Namebanlam Nongkseh, Chanjib Chettry, Thrisilbirth A Sangma. Kumjuh ki coach kiba kynthup ïa u Bah Jeffery Warlarpih bad u Pynkhreh Nongkseh.
