Shillong, Nailur 04
Ka Laitkyrhong SC bad ka Marbisu SC ki la khur ia ka jingjop ha ka lympung ialehkai Second Division Football League 2024 ba la pyniaid da ka Shillong Sports Association ha ka sngi Balang.
Ha ka jingiakhun kaba nyngkong kaba la long ha SSA Stadium kaba ha First Ground, Polo, ka Laitkyrhong SC ka la lah ban pynliem noh ia ka Imson SC da 4-1 kol bad u Shngaiñlang Surong u la ioh ban the par kol.
Ha kane ka jingiakhun ka Laitkyrhong ka la ioh ban pynkhih jar tang ha ka minit kaba 8 lyngba u Shngainlang. Kane ka kynhun ka la pynbud biang ia ka kol kaba ar lyngba u Learningstar Warlarpih uba la thep ha ka minit kaba 19.
Hadien katto katne por ka Imson ka la lah ban pynphai kylla lyngba u Anju L. Marshillong ha ka minit kaba 22. Haduh kaba kut jong ka kylla step kane ka kynhun kam shym la lah shuh ban pynphai bad ka la pynlong ia ka Laitkyrhong ban dangtam da 2-1 kol.
Hadien katto katne por ba la bteng biang ia ka jingiakhun jong ka kylla miet ka Laitkyrhong ka la ioh biang ban thep kol lyngba u Banshaibok Khongsngi ha ka minit kaba 78 bad ia ka kol kaba khatduh la thep biang da u Shngainlang ha ka minit kaba 90 na ka bynta ban khur syndon ia ka jingjop.
Haba phai sha kawei pat ka jingiakhun kaba ar, ka Marbisu SC ka la pynliem noh ia ka Laitlyngkot SC da 1-0 kol bad ia kane ka shi kol la thep da u Damanbha Mylliemngap ha ka minit kaba 57.
Kane ka lympung kan bteng biang ha ka sngi Palei ha kaba ka Umlyngka SC kan iakhun pyrshah ia ka Lumparing SC ha ka por 12:30 bad ka Mawkriah West SC ia ka Lawmali SC ha ka por 3:30 janmiet.
