Jowai, Nailur 05
10 ngut ki ‘rang bad ‘thei ïalehkai badminton na West Jaiñtia Hills District kin mihkhmat ïa ka Jylla ha ka lympung ïalehkai ‘North East Zone Inter State Badminton Championship 2024’ ka ban long ha nongbah Guwahati naduh 7 tarik haduh 10 tarik mynta u bnai.
Kine ki kynthup ïa u Mebankerlang Shullai, Dei-langwa oo Nongpluh, Gregoreo Passah, Banshanbor Lamare, Lemi Nelson Suchiang, Hunbait S Manner, Salonbhami Suchiang, Lechan Suchiang, ka Nihaka Lamare bad ka Josefina Dala Passah. Ha ka kyrdan Senior ki long 4 ngut bad ha ka kyrdan Under-19 ki long 6 ngut.
Kum shi bynta ban ai mynsiem ïa kine nong-ïalehkai, ka West Jaiñtia District Badminton Association (WJDBA) ha ka janmiet jong ka Sngi Palei ka la pynlong ïa ka jingïalang ban ai kitbok kitwriang na ka bynta kane ka jingleit ïashim bynta jong katei ka kynhun.
Na ka liang u President WJDBA u Bah D. Pyrbot, Vice President Bah Jlankupar Rymbai, General Secretary Bah Rimilan Passah ki la kyntu ïa ki ban trei shitom bad ban ïalehkai bha ha ryngkat ka kitbok kitrwiang ruh ba kin poi sha ka thong ban wanrah nam bad burom ïa ka District bad ka Jylla hi baroh kawei.
Kine ki nongïalehkai kin mih ha ka sngi Thohdieng na ka Jylla bad yn ïalam da u Manager u Prem Joshi, u Coach u Salrak Marak bad Barisuk Shyrkon.
