Shillong, Nailur 05
Ka East Jaiñtia Hills District Football Association (EJHDFA) ka la pynpaw ïa ka jingsngewsih halor ka jingkhlad kyndit u rephri rangbah, u Waheh Romi Dkhar uba dei na ka shnong Wapung.
Une u rangbah u la khlad ha ka janmiet jong ka Sngi Palei (5 tarik) ha Civil Hospital Khliehriat.
Kumta, kane ka long ka jingduh bakhraw ïa ka synjuk namar u dei u rangbah uba ïarap bha ïa ka synjuk khamtam ha kaba ïadei bad ki jingïalehkai bad ki division ba kham heh namar u long u briew uba ïeit bad shim khia bha ïa ka kam, la ong ka kyrwoh.
Na ka liang ka EJHDFA ka phah ka jingsngewlem sha ki bahaïing bahasem jong une u rangbah. Ka jingleit ontep ïa u Romi kan long ha ka 7 tarik ha u lum jingtep jong ka Balang Presbyterian Wapung Shnong. Ka EJHDFA ka la pyntip ba la pynsangeh shwa ïa baroh ki jingïalehkai ha ka sngi tep.
