Imphal, Nailur:
Katkum ka jingbuh jingkheiñ jong ka kynhun kaba ju ïakhun pyrshah ha ka kyrni dih drok jong ka Manipur, ka Shanlung Action Support Organisation lane ka SASO, la shem ba ka jingpynmih kaiphot jong ka ka la pynkyndit ïa baroh, ha kaba kumba ka paw, la ong ba ka la don ka jingkiew kaba shyrkhei ha ka jingïap jong ki briew na ka jingdih drok, ha kine ki arphew snem ba la leit noh.
Kane ka kaiphot, kaba la paw naduh ka sngi ba la don ka jingpynsngewthuh paidbah shaphang ka jingdih palat pud ïa u drok, kaba la dep ban rakhe ha ka pyrthei baroh kawei, kane ka jingdon jong kane ka kaiphot ka pynpaw shisha ïa ka jingsngewsih haba peit bniah ïa ka jylla dala ki khmat.
Katkum ka jinglap jong ka SASO-kaba long ka seng ka bym don jingïoh jingmyntoi kaba la khmih bniah ban lah ban ïakhun pyrshah halor ka jingdon jong kiba pyndonkam bakla ïa u drok ha Manipur la ong ba ki la don kumba 81 ngut kiba ïap namar ka jingdih palat ïa u drok naduh u snem 2004 haduh u bnai Lber, 2024.
Napdeng kine kiba la shah ktah, 21 ngut ki dei ki kynthei, kaba pyni ba ka jingap jingma jong u drok ka la ap lypa na shajngai.
Ka rta jong kito kiba la ïap ka long naduh kiba dang 17 snem haduh 65 snem.
Ki jingbuh jingkheiñ ki dei ka bynta jong ka thup jingtip kaba kham heh kaba buh kyrteng ïa ki 1,737 tylli ki jingjia jong ka jingdih drok palat ha kajuh ka por.
Kumba 1,656 ngut ki briew ki la long kiba donbok ban lait im na kum kine ki jingjia kiba sngewsih, hynrei kiba sah-81 ngut ki briew shimet-kim shym la long kiba donbok bad ki la ngop ha ka jingbrai pyrthei jong ka jingdih buaid kaba la bat slem ïa kane ka jylla.
U General Secretary jong ka SASO u Sashikumar u kdew ïa kane ba ka long kaba shyrkhei: na ki san tylli ki jingjia ba la buh jingthoh da ka seng ha u snem 2005, ka jingdon jong kiba pyndonkam bakla ïa u drok ka la kiew suki suki shaduh u pud uba ishyrkhei kumba ka paw mynta.
Kane ka jingkiew ka long ka dak jong ka jingeh kaba kham khraw bad kaba kham shyrkhei kaba la sdang ban bat bad tehmraw ïa ka Manipur naduh ki snem 1980, khamtam ha ki jaka kiba hajan u pud u sam.
Ka jingpyndonkam bakla ïa u drok, kam dei tang ka jingeh ha ka koit ka khiah, ka dei ka jingeh ha ka imlang-sahlang.
Katno ka jingeh ka long kaba khia lah ban thew na ka jingkheiñ jong u Myntri Rangbah ka Jylla u N. Biren Singh katto katne por mynshwa kaba la ong ba ki la don palat 1.5 lak ngut ki briew ha Manipur ki shah ktah ha ka jingdih drok.
Ka jinglong jingman ka dang long kaba shyrkhei kumba kane ka kaiphot ka ong, da kaba shim ïa ki jingtip ba thikna, 4% na ki nongshong shnong ha ka rta 10-75 snem ha ka jylla ki shah ktah na ka jingpyndonkam bakla ïa ki dawai Opioid.
Kane ka buh ïa ka Manipur ba kan wan ha ka kyrdan kaba san jong ka jingjah burom napdeng ki jylla ha ka ri India ha kaba ïadei bad ka jingbun jong ki briew kiba pyndonkam bakla ïa ki dawai Opioid.
