Shillong, Nailur 08
Ka Myngken Christian HSS kan pynkhreh ïa ka jingïakhun semi final ha ka Under -17 jong ka lympung ïalehkai 63rd Subroto Cup International Football Tournament 2024 pyrshah ïa ka Govt. HSS kaba na Arunachal Pradesh ha ka Lah Sngi U Blei ha ka por 10 baje mynstep ha Tejas Football Ground kaba ha nongbah Delhi.
Kane ka kynhun ïalehkai kaba na Bhoirymbong ka la lah ban pynliem noh ïa ka CISCE Minerva Public School kaba na Punjab da 3-1 kol ha ka jingïakhun quarter final kaba la long ha ka sngi Saitjaiñ bad u Banganson Nongphlang u la khur ïa hat-trick.
Na ka liang ka Khasi Hills Autonomous District Council hapoh ka jingïalam u Bah Pynïaid Sing Syiem kum CEM, ka la ai ka kitbok-kitrwiang ïa ka Myngken Christian ha shwa ba kan aireng pyrshah ïa katei ka kynhun na Arunachal Pradesh.
Kat kum ka kyrwoh, la ong ba u Bah Pynïaid u la ai khublei kyrpang ïa ki rangïalehkai, ki nongpynïaid jong katei ka skul bad ïa ki coach kiba la lah ban poi shaduh ka semi final. Da kane ka kitbok-kitrwiang kan long ka jingai mynsiem ïa ki khynnah ïalehkai ba kin poi sha ka thong jong ka jingjop ha kane ka jingïakhun.
Ka Govt. HSS na Arunachal ka la pynliem ïa ka Haryana 4-3 kol ha kawei pat ka jingïakhun quarter final. Ha kiwei pat ki jingïakhun ka Sri Lanka Schools Football Association ka la pynliem noh ïa ka Mizoram da 2-1 kol bad ka TG English School kaba na Manipur ka la jop da 1-0 kol ïa ka CBSE. Kumta ka Sri Lanka Schools Football Association kan ïakynduh pyrshah ïa ka TG English School ha ka por 7:30 mynstep.
