Agartala, Nailur:
U Myntri ba dei khmih ïa ka tnat Labour ha Tripura u Tinku Roy u la kam ba ki la don kumba 20,000 ngut ki briew ki la shah thung kam ha ki tnat sorkar bapher bapher ha kine ki lai snem ba la leit.
Ha ka jingïakren halor ka jingeh jong ka jingkyrduh kam kaba la sdang da u MLA ka Congress u Sudip Roy Barman, u Myntri u la ong ba 20,000 ngut ki briew la thung kam ha ki bynta bapher bapher ha ki lai snem ba la leit.
U Myntri u la ong ba ka rukom treikam halor kane ka la dep sdang hashwa na ka bynta ban pyndap sa 20,000 tylli ki kam ha ki tnat sorkar bapher bapher.
U Myntri u la kam ba ka jingdon jong ki samla ba la pynrung kyrteng ha ka thup jong kiba khlem kam-khlem kam ka la duna na ka 7,41,305 ha ka 31 tarik, Lber, 2018 sha ka 3,09,882 ha ka 31 tarik, Lber, 2024.
“Kam dei kaba shisha ba ki nongwad ki sngewsih… Ka jingdon jong ki bym don kam ba la pynrugn kyrteng ha kylleng ka jylla ka la hiar da jan ar shah naduh u snem 2018 haduh u snem 2024 namar ki jingtrei shitom bad ki jingpyrshang baroh ban weng ïa kane ka jingeh,” u la ong.
Hashwa, u Roy Barman u la kynthoh ïa ka sorkar ba la ïalam da ka seng BJP, da kaba ong, “Ka jingdon jong ki Engineer kiba khlem kam ka la kiew haduh 1,800 ngut katba ym pat don ka jingpynrung kam ïa ki Engineer ha kine ki bun snem ba la dep. Kumba 1,500 ngut ki samla kiba la ïoh ïa ka kyrdan pule SLET, NET bad PhD ki shang na kawei ka jaka sha kawei pat halor ka jingthmu ban wad kam ha ka tnad sorkar. Kane ka jingkheiñ ka long kaba bun na ka bynta ka jylla kaba rit kum ka Tripura.”
Haba wan ka jinghiar palat halor ka jingkynnoh ba la pynslem ban thung kam ha ki tnat bapher bapher, u Roy Barman u la ong, “Kumba 5,000 ngut ki nongtrei ki shongthait na ka kam jong ki man la u snem hynrei shano ki nongmih bujli?”Une u MLA ka Congress u la dawa ruh ba dei ban weng noh ïa ka jingpynrung kam da ka Outsourcing bad ka Fixed Pay namar ba ki briew kiba ïoh kam hapoh kine ki ar bynta ki dang shah pynduh ïa ki katto katne ki jingmyntoi.
U nongïalam ka liang pyrshah ha ka ïingdorbar, u Jitendra Chaudhury, u la ther ruh ïa ka sorkar namar ba kam shym la lah ban pyndep ïa ka jingkular jong ka BJP ban pyndap ïa ki 50,000 tylli ki kam ba lait kiba la buh shwa ka ilekshon Assembly ha u snem 2018.”
Ki nongïalam jong phi ki la kular ban pyndap ïa ki 50,000 tylli ki kam kiba sah thylli ha ka kam sorkar shwa ka ilekshon Assembly ha u snem 2018. Hynriew snem ka la dep hynrei shano ka jingleit ban pyndap ïa ki 50,000 tylli ki kam? Katno tylli ki karkhana la seng ha ka jylla.
“Ki samla ki sngewsih namar ka jingduna kam ha ki tnat sorkar. Ka sorkar ka dei ban weng ïa ka jingeh jong ka jingkyrduh kam jong ka jylla,” u la bynrap.
