Itanagar, Nailur:
Ka jingpluh ding kaba shyrkhei ka la jia ha Seppa kaba don ha East Kameng distrik ha Arunachal Pradesh, ha ka miet jong ka Sngi Saitjaiñ kaba la pynjulor ïa 23 tylli ki ïing. Kane ka jingpluh ding ka la sdang ha ka por 7 baje janmit ha Abotani Colony, la ïathuh u Superintendent of Police (SP) jong ka East Kameng u Kamdam Sikom.
Haduh ba la thoh ïa kakhubor ym pat lah ban tip ïa ka daw halor ka jingsdang jong ka jingpluh ka ding bad la antad ba ka la dei na ka jingthut jong ka bording ha kawei napdeng kine ki ïing ba la ing, la ong u Sikom. Ka long kaba donbok ba ym shym don mano mano ki ban ïap ne mynsaw ha kane ka jingjia, la ong u Sikom ha kaba u la bynrap shuh shuh da kaba ong, ki bor pynïaid distrik ki la ai jubab ha kaba ïadei bad ka jingbuh ïa ka jaka sah ba shipor na ka bynta kine ki lanot ha LBS-II School kaba don ha Seppa.
Katkum ka jingïathuh jong ki nongsakhi, la ong ka ding kaba la pur bad kaba la klang ka la pynjulor bad pynkylla dpei lut ha kaba ka la pynjulor ïa ki jingdon jingem, ki kot ki sla ba donkam, ki tiar ïing bad bun kiwei pat ki jingdonkam. Na ka liang u Myntri Rangbah jong ka jylla u Pema Khandu u la pynpaw ka jingsngewsih halor ka ne ka jingjia.
“Ka long kaba sngewsih ban tip ba ki la don kumba 23 tylli ki ïing kiba la shah pynjulor na ka jingklang jong ka ding ha Seppa. Sngewbha wat ym sheptieng, ngi don ha syndah jong phi na ka bynta ban leh ïa kaba donkam,” la ong u Khandu ha ka jingthoh kaba u la phah ha ka X. U la ong ba u la phah ïa ki heh ba dei khmih na East Kameng ban ai jingïarap sha ki lanot ha ryngkat ki jingpyntreikam katkum ki kyndon.
“Ka la don ka jaka sah ba shipor ba la buh. Nga kyrpad ïa baroh kito kiba shah ktah ba kin pyndonkam ïa kane ka jaka sah ba shipor khnang ba kin lait na kino kino ki jingshah ktah bad khnang ban lah ban pynbit pynbiang ïa kiei kiei baroh ha kaba ïadei bad ka jingjia,” la ong u Myntri Rangbah.
