Shillong, Nailur 09
Ka jingpynrung kyrteng ki nongïashim bynta ha ka 3rd Sohra International Half Marathon 2024 ka la kynjoh sha palat 7000 ngut bad kane ka long arshah na u snem ba la dep, la pynbna ki bor pynïaid ka Meghalaya State Olympic Association ha ka lah sngi U Blei.
Ïa kane ka jingïakob mareh yn pynlong ha ka 21 tarik mynta u bnai Sohra ka ban phiah ha la ki jong ki kyrdan ïakob naduh ki khynnah, ki samla haduh ki rangbah.
Kane ka jingïakob mareh kaba hap hapoh ka jingkhmih da ka Athletics Federation of India, yn pynlong da ka Meghalaya Athletics Association ha ryngkat ka MSOA kumjuh ka jingkyrshan lang da ka tnat ïalehkai jong ka Sorkar Jylla.
Ki kyrdan ïalehkai ha kane ka jingïakob ki kynthup ïa ka 21K Elite Open (above 18yrs), kumjuh ka 21K Open (above 18yrs), 10K Open (40yrs to below 50yrs), 10K Open (50yrs to below 60yrs) bad ka 5K Run For Fund na ka bynta ki kynthei bad shynrang.
Kane ka jingïakob kan sdang na Laitsohpliah sha jingkieng Mawkdok bad ban pynkut ha Mawsmai ha Nohsngithiang Falls viewpoint.
Haba ïakren bad ki nongthoh khubor, u General Secretary ka MSOA u Bah Finely Pariat u la pynpaw ba ka jingdon ki nongïalehkai kiba la dep ban pynrung kyrteng ïalade ki la long haduh palat 7000 ngut. “Haduh kaba kut jong ka jingpynrung kyrteng ki la don palat 7736 ngut ki nongmareh ki ban ïashim bynta ha kane ka jingïakob bad kane ka la long arshah na kaba long ha u snem ba la dep. Ki don ruh 7 ngut ki nongmareh ki ban wan nabar ri kiba kynthup ïa 3 ngut na Kenya, 2 ngut na Ethiopia bad 2 ngut na Bangladesh.”
“Ha ka jingshisha ngi dang-khmih lynti ba ki don kumba 4000 ngut ki nongwan shim bynta, hynrei ngim shym la poi pyrkhat ba kin kham bun mynta u snem. Kumta ka jingsam ïa ki chest number kan long ha ka 19 bad 20 tarik mynta u bnai ha JN Stadium,” u la bynrap.
Ha kawei pat ka liang u Working President ka MSOA u Bah John F. Kharshiïng u la pynpaw ïa ka jingkhmih lynti ba lyngba ka jingbun ki nongwan shim bynta mynta u snem kin don ki ban lah ban pynpra ïa ka rekod na u snem ba la dep.
Katba u Director ka tnat ïalehkai u D.D Shira u la ïathuh ba la pynbiang lut nadong shadong halor kane ka jingpynkhreh ïa kane ka jingïakob. “Kum ka Organising Committee ngi la dep shong ïa ka jinglang ha ka taïew ba la dep bad ngi la pyrkhat sani bha ïa baroh ki jingdonkam bad ban pynlong ïa kane ka jingïakob mareh kaba seisoh.”
Lah ban pynkynmaw ba ka jingpynlut ïa kane ka Marathon kan long T. 2 klur 3 lak tyngka bad la pynkhreh ruh ïa ki khusnam na ka bynta baroh ki nongjop ha la ki jong ki kyrdan ïakob.
