Kolkata, Nailur:
U MP jong ka Trinamool Congress (TMC) u Jawhar Sircar ha ka Sngi U Blei u la phah jingthoh sha ka Myntri Rangbah jong ka West Bengal bad ka heh nongïalam jong ka seng ka Mamata Banerjee, ha kaba u la tyrwa ban hiar shuki bad iehnoh kam na Rajya Sabha.
Kane ka rai ka la long hadien ba la jia ka jingshah leh beijot bad shah pynïap beiñ jong kawei ka doktor kaba dang shah hikai pyntbit ha RG Medical College and Hospital ha Kolkata, kaba dang jia shen, kaba la pynmih ïa kiba bun ki jingïakhih ha ka ri baroh kawei.
Ha ka shithi jong u sha ka Myntri Rangbah, u Sircar u la pynpaw ïa ka jingsngewsih kaba khraw halor ka rukom synshar jong ka sorkar haba ïanujor bad ki jinglong jingman bad u la kyntu ïa ka Mamata Banerjee ba kan shim khia bad ban leh ei ei na ka bynta ban “pyllait im ïa ka jylla.”
“Katba nga pynpaw ka jingsngewnguh naduh ka dohnud ïa phi ba phi la ai ïa nga ïa ka lad ban wanrah ïa ki jingeh jong ka West Bengal kum u MP ha Rajya Sabha, nga dei ban pyntip ïa phi ba nga la rai ban iehnoh kam na ka Parliament bad ruh na ka kam saiñ pyrthei ha baroh ki liang,” u la ong.
“Nga la ïaishah shitom da ka jingshaniah haduh shibnai naduh ka jingjia kaba shyrkhei kaba la jia ha RG Kar Hospital, bad nga la kyrmen ïa ka jingïarap bad ka jingtuklar jong phi da ka jingïakhih jong ki Junior Doctor kiba long ki rukom leh ba mynshwa jong ka Mamata Banerjee”, la ong ka shithi ba la thoh.
U MP u la ong shuh shuh, “Kam shym la long kam ei ei, bad kino-kino ki sienjam ban shim ha ka ban pynshitom ïa ki nongleh bymman kiba ka sorkar ka shim mynta ki long kiba tlot palat bad kiba la shim por. Nga tharai ba ka jingbit jingbiang ka lah ban wanphai biang ha kane ka jylla kham kloi lada la pynpra ïa ka kynhun jong ki doktor kiba bamsap bad ïa kito kiba donkti ban shim ïa ki kam synshar bym dei la pynshitom mardor hadien ba la jia ka jingjia kaba sngewsih.”
U Sircar, uba la leit ban pynïasoh sha ka TMC ha u snem 2021, u la pynpaw ruh ïa ka jingbym sngewtynnad jong u halor ka jingleh jong ka sorkar jylla ha kaba ïadei bad ka jingdon jong ka kam bamsap, khamtam eh ha kaba ïadei bad ka jingdonkti jong u Myntri barim ka tnat pule- puthi ha ka bamsap.
