Shillong, Nailur 11
Kan long ka jinglehraiñ kaba khraw ïa ka Jylla hi baroh kawei hadien ba ka kynhun ïalehkai Under-14 ka la shah weng shi syndon na ka lympung ïalehkai Sub-Junior Boys’ National Football Cham-pionship (Tier 1) mynta u snem na ka daw ba ki la don katto-katne ngut na ki rangïalehkai kiba la palat ïa ka rta ba la buh.
Kane ka jingshah weng ka dei ka jingshukor ki khynnah ïa la ki rta da kaba wanrah da ki syrnod ki bym shisha. Nalor ka Meghalaya, ka Arunachal Pradesh ka la ngat lang ha kane kajuh ka apot.
Kane ka lympung ïalehkai ka la sdang naduh 7 tarik ha Bangalore, ha kaba kan Meghalaya ka la don ha ka Group-C kaba kynthup lang ïa ka Mizoram, Odisha bad ka Delhi, katba ka Arunachal ka la don ha ka Group-A kynthup ïa ka Karnataka, Punjab bad Bihar.
Na ka daw ka jingshah weng noh jong kitei ar tylli ki kynhun, kin don noh sa tang mar lai tylli ki kynhun ha baroh ar tylli ki group.
Ban pynshisha ïa ka snem ba shisha jong ki khynnah, la ong ba ka All India Football Federation (AIFF) ka hap ban pyndep ïa ka jingleh eksamin lyngba ki kor ki bor ka juk stad thymmai na ka bynta ban bishar bniah ïa ki bniat jong ki khynnah, kumjuh lyngba ka X-ray bad MRI.
