Shillong, Nailur 13
Ka Meghalaya Police F.T ka la lah ban pynliem haduh 8-0 kol ïa ka Imson SC ha ka lympung ïalehkai Second Division Football League 2024 ba la pynïaid da ka Shillong Sports Association bad u Pynshailang Lyngkhoi u la ïoh ïa ka hat-trick.
Ha kane ka jingïakhun kaba la long ha ka Sngi Thohdieng kaba la long ha SSA Stadium kaba ha Polo, ka MLP ka la ïoh ban pynkhih jar nyngkong eh tang mar ïasdang ka jingïalehkai lyngba u Everestarly Rynjah ha ka minit ka 5.
U Pynshailang Lyngkhoi u la ïoh ïa ka hat-trick da kaba thep haduh lai kol ha ka minit kaba 36, 64 & 70. Ïa ki ar kl la thep da u Aldrin M. Ramsiej (11 & 59), katba ïa kiwei pat la thep da u Banraplang Mawphlang (45) bad u Chesterfield Nongdhar (61).
Haba phai sha kawei pat ka jingïakhun kaba ar ka Smit SC ka la pynliem noh ïa ka Laitkyrhong SC lyngba ka shi kol ba la thep da u Damewanshan Nengnong ha ka minit kaba 45+1.
Ka jingïalehkai ha ka Third Division ha ka sngi Saitjaiñ kan long hapdeng ka Mawpat SC pyrshah ïa ka Umlyngka SC ha ka por 12:30, katba ka Gorkha Association ïa ka Mawkriah West SC ha ka por 3:30 janmiet.
