Bertina Lyngdoh
U duk, u suk, u shitom shipa, u donkam ïa u synñiang u bynhei na ka imlang sahlang. Ka imlang sahlang ka dei tang kawei na ki lad kaba pynim ïa u duk u suk ha ka jingkyrmen jingshngaiñ mynsiem. U synñiang u bynhei na ka imlang sahlang ka long ha kiba bun rukom kata da ka pisa, ki jaiñ ki nep, ki kor ki bor ka juk stad mynta, ka ïing, bad kiwei kiwei. Kine ki jingnoh synñiang bunsien ka wan na ki seng kynhun treimon sngewbha, lym ruh na ki riewshimet. Dei da kumne, ba u duk u suk u ïoh ban im ha ka jingkyrmen.
Ka wit ka wa bad ka jingkhang lynti ka don ha ka jingim briew. Ki mawjynthut bunsien ka ju long ïa uba duk uba jynjar. Balei kane ka wan jia ? Kane baroh ka dei namar ka jingduna ha ka ïoh ka kot. Lada biang ha ka ïoh ka kot, bun ki lad ki lynti ruh ki plie. Ha bym biang pat ka ïoh ka kot, ka lad ruh kam plie satia. Sngewtynnad pat, haba don kum ki riewshimet, ruh ki nongtreimon sngewbha, ban ïarap bad kyrshan lem ïa uba duk ban rat dyngkhong ïa ka jingeh ka ïoh ka kot. Ka ïoh ka kot ka long kawei kaba plie lad plie lynti, kaba pyndap ïa ka kpoh, kaba pynkhiah ïa ka jingpang, kaba kyntiew ïa ka kyrdan pule, bad kaba pynïoh kam pynïoh jam.
Namarkata, bun uba kham donkam ïa ka nohsynñiang ka ïoh ka kot naba ki tip kham bha haei bad kumne ban pyntreikam ïa ka. Ki nongtreimon sngewbha lym ruh ki riewshimet kiba leh ïa kum kane ka kam ki long shisha ka jingkyrkhu ïa uba shi-tom uba kut lad.
Kumta, u synñiang u bynhei jong ki, ki long ki jingkyrkhu na shalyndet ki bymjukut. Kine ki long ka jingpynim ïa ki mynsiem ba la ïap. Ki long ruh ka jingkhiah ïa kiba pang ba shitom.
Katta nang heh ka imlang sahlang, nang bun uba pang ba shitom, u duk u rangli. Kumta, ïa u synñiang u bynhei ka imlang sahlang ruh nang donkam. Kynmaw ba haba noh synñiang kam da dei eh da ka dor ba heh hynrei kat ka jinglah jong phi. Haba noh synñiang na ka bynta ba bha, arshah kylliang phin ïoh pdiang na sha ka kti ka mon u kpa.
