Aizawl, Nailur:
Ka kynhun CID Special Branch ka la ïoh ban bat ïa lai tylli ki kali ha ki bynta khappud jong ka Aizawl ha ka janmiet jong ka Sngi Ba-ar bad pynlong ruh ban ïoh kurup ïa u drok uba la kot sha palat T. 6 klur.
Kumba la antad la ong ba ha ka por 10:00 mynmiet, ki heh ka kynhun tohkit ki la pynlong ïa ka jingleit khynra ha Hualngohmun, ha kaba kane ka la pynlong ban ïoh kurup ïa ar tylli ki kali.
Kawei ne kine ki kali ba la shah kurup kaba dei ka Renault Kwid (Registration No. MZ01N-3642) la lap ba ka don haduh 32.013 kg u drok ba la suba ba u dei u Methamphetamine uba shong dor T.4,14,16,900 bad 249 grams ba la suba ba dei u Heroin kaba shong dor T.70,400.
Ïa une u nongñiah kali la tip kyrteng kum u Lalthansiama (26) na Khawmawi, Myanmar. Na kawei pat ka kali, ka Datsun Redi Go (Registration No. MZ02A-9053) la lap ba dei u drok uba la suba ba u dei u Methamphetamine uba don ka jingkhia kaba 8.021 kg bad uba shong dor T.1,04,27,300 bad 565 grams ha kaba la suba ba u dei u Heroin uba shongdor T.100,500.
Ha kane ka jingjia ruh, la kem noh ïa u nongñiah kali ïa uba la tip kyrteng kum u Zoremmawia uba dei hi na Khawmawi bad uba sah shipor ha Muanna Veng, Aizawl.
Kawei pat ka kali kaba lai na kiba la ïoh ban kurup, kaba dei ka i10 Magna (Registration No. MZ01G-5672) kaba la phet krad na katei ka jaka kaba nyngkong, ka la shah bat ha Muanna Veng, Zuangtui, ha ka step jong ka Sngi Ba-ar.
Na kane ka kali la lap ba ka don 2.284 kg u drok ba la suba ba dei u drok heroin, kaba shong dor T.68,52,000.
Katba u nongñiah jong kane ka kali, ïa uba la tip kyrteng kum u David na Zokhawthar, u la lait na ka jingshah kem, uwei u samla uba dang poh rta uba shong ha kane ka kali u la shah rah ha ki pulit.
Na kane ka jingpynlong ïa ka jingleit khynra la ïoh ban kurup haduh 40.034 kg u drok ba la suba ba u dei u Methamphetamine, uba shongdor T.5,20,44,200, bad 3.098 kg u drok ba la suba ba u dei u heroin, uba shong dor T.92,94,000.
Ïa kine ki briew kiba la shah kem ha ryngkat u drok, uba la shongdor da T.6,13,38,200 la aiti noh sha ki pulit ka Special Narcotics Police Station.
Ha kaba ïadei bad kane ka jingjia la buh da ka jingujor mukotduma hapoh ki kyndon jong ka Special Narcotics PS Case No.36/2024, bad ka jingtohkit halor ka rukom khaïi ïa u drok ka dang ïai bteng.
