Kolkata, Nailur:
U MP jong ka seng Trinamool Congress u Abhishek Banerjee hynnin ka sngi u la kyntu ïa ki doktor kiba la pynlong ïa ka jingïakhih ha Kolkata ba kin sangeh noh ïa ka jingïakhih jong ki da kaba sangeh treikam bad ban ïatreilang bad ka sorkar West Bengal ban pyntreikam ïa ki lad ki lynti ban pynthikna ïa ka jingshngaiñ bad jingïoh jingïada jong ki.
U la ban jur shuh shuh da kaba ong ba “naduh ka sngi kaba nyngkong, nga la kyrshan ïa ki doktor halor ki jingsngewkhia jong ki ha kaba ïadei bad ka jingshngaiñ bad ki jingïoh jingïada”.
Kine ki doktor khynnah kim shym la sdang biang ïa ka kam naduh ba ki la sdang ïa ka jingïakhih jong ki hadien ka jingjia jong ka jingshah leh be-ijot bad shah pynïap jong kawei ka doktor kaba dang shah hikai kaba la 31 snem ka rta ha RG Kar Medical College and Hospital jong ka Kolkata ha ka 9 tarik, Nailur. Tang shisngi hadien ba ki la ïakynduh ïa ka Myntri Rangbah ka jylla ka Mamata Banerjee ha ka jingïakren ban pynkut noh ïa ka jingïakhih, ki doktor kiba la pynlong ïa ka jingïakhih hynnin ka sngi ki la pynbna ba ka jingïakhih jong ki kan sa ïai bteng haduh ban da urlong ki jingdawa ba ki la buh, kynthup ïa ka jingweng kam ïa u Health Secretary jong ka Bengal bad ka jingïakren kaba thymmai bad ka sorkar jylla.
Ha ka jingai jubab, u MP lyngba ka rynsan phah khubor ha ka Tweet u la ong ba u la “pynskhem ruh da kaba ong ba bun na ki jingsngewkhia jong ki (ki doktor), lait noh tang katto katne, ki long kiba dei, kiba don jingmut bad kiba don nongrim”.
U la ong ba, katkum ka jingbthah jong ka Supreme Court bad ki jingai jingmut jong ka sorkar Bengal hakhmat ka ïingbishar ba ha khliehduh ha ka sngi Ba-ar la ong, “kiba bun ki lad ki lynti ban pynbha ïa ka jingshngaiñ bad jingïoh jingïada jong ki doktor ki dang ïaid shakhmat, kynthup ïa ka jingbuh ïa ki CCTV Camera bad ki jingpynbha ha ka ban shna ïa ki jingdonkam ha ki Medical Colleges and Hospitals kiba don ha kylleng ka jylla West Bengal, ha kaba la khmih lynti ba yn sa lah ban pyndep hapoh 14 sngi”.
“Shuh shuh, nalor kane, ka sorkar ka la burom ïa ki jingdawa jong ki ban pynkynriah kam ïa ki katto katne ngut ki heh ka tnad ka koit ka khiah bad jong ka tnat pulit jong ka Kolkata.”
