Hyderabad, Risaw:
Ka Kavitha ka la kynthoh ba ka sorkar Revanth Reddy ka la pyndonkam ïa ka spah jong ka Telangana ban bei tyngka ïa ki kam saiñ pyrthei jong ka Congress, da kaba kynnoh ba katei ka jylla ka la long kum ka “ATM” ïa ka seng .
Ka K Kavitha, ka khun jong u Myntri Rangbah barim ka Telangana, u K Chandrashekar Rao (KCR), ka la kyntait ïa kano kano ka jingiajan bad ka Bharat Rashtra Samithi (BRS), da kaba kynnoh ba ki nongialam jong ka, ki leh khlem akor ïa ki jingkynnoh bamsap bad kim lah ban weng ïa ki jingeh jong ki nongtrei ka seng.
Haba pyni ïa ka kynhun sain pyrthei ba thymmai jong ka, ka Telangana Rashtra Sena (TRS) kum ka lad ban ialeh pyrshah ïa ki seng kiba la seng, ka Kavitha ka la ong ba ka Telangana ka la pynkhreh na ka bynta ka kynthei myntri rangbah.
Ha ka jingïakren bad ki lad pahtai khubor ka Kavitha ka la ong ba ka party jong ka kan pynleit jingmut ha kaei kaba ka la batai kum ka agenda bym pat dep jong ka jingïakhih ban ïoh ïa ka jylla Telangana. Watla ka seng ka dang thymmai, hynrei ka la ong ba ka la pynlut arphew snem ban trei hapdeng ki briew bad ban ïaleh na ka bynta ki jingeh jong ki.
Ka Kavitha ka la kynthoh ruh ïa ka sorkar Revanth Reddy ba ka la pyndonkam ïa ka spah jong ka Telangana ban bei tyngka ïa ki kam saiñ hima sima jong ka Cong ress sha kiwei pat ki jaka ha ka ri, da kaba kynnoh ba ïa kane ka Jylla la pynkylla kum ka “ATM” na ka bynta ka seng.
“Ngam kwah shuh ban trei bad ka BRS satia,” la ong ka Kavitha, da kaba kyntait ïa ka jinglah ban leit phai biang sha ka seng jong u kpa jong ka.
Haba batai ïa ka jingkhlad noh jong ka na ka BRS, ka la kam ba ka la pynpaw bunsien ïa ka jingsngewkhia halor ka jingbamsap bad ka jingleh ïa ki nongtrei ka party bad ki nongïalam ba ha khlieh duh hynrei ym shym la leh eiei. Ka la batai ïalade kum ka nongpynbna khubor kaba la shah beh noh ha kaba kut na ka seng.
Ka Kavitha, ka la ther tyngeh ruh ïa ka sorkar Congress ha Telangana, da kaba kynnoh ba kam shym la lah ban pyndep ïa ki jingkular jong ka sha ki paidbah. Ka la kynnoh ba ka BJP ka bud ïa ka buit “phiah bad synshar” bad ka la kynthoh ba ka jylla ka donkam ïa ka seng thain kaba khlain kaba pynleit jingmut ha ka bha ka miat jong ki paidbah.
Ka Kavitha ka la ong ba ka jingmih jong ka bor sain pyrthei kaba thymmai ka la pynkulmar ïa ki seng kiba la seng. Haba ïadei bad ka rai jong ka ban sdang ïa ka jingïalap elekshon jong ka ha ka konstitwensi jong u Myntri Rangbah ka Jylla A Revanth Reddy, ka la ong ba ka Telangana ka donkam ïa ka kynthei ban synshar.
“Nga ngeit ba ka la dei ka por ba ka Telangana kan don ïa ka Myntri Rangbah ka kynthei”, ka la ong bad bynrap ba ka BRS, ka BJP bad ka Congress baroh ki sngewkhia halor ka jingmih jong u nongïakhun ba thymmai.
Ka la pynpaw ruh ïa kaei kaba ka la batai kum ka jingduna ki nongïalam kynthei ha ki kyrdan ba ha khlieh duh jong ka sain pyrthei jong ka ri India.
