New Delhi, Risaw:
Ka President jong ka AISA, ka Neha Bora, ha ka sngi Palei, ka la rah sha ka Delhi High Court, da kaba tuklar ïa ka jingpynbna jong ki pulit, kaba bthah ïa ka, ba kan pyntreikam ïa ka jingïateh, na ka bynta ban pynneh ïa ka jingsuk, da kaba ong, ba ki nongshong shnong, kim donkam ïa ka jingbit, ban pynher ïa ka lama ka ri.
Ha kaba ïadei bad ka jingpynbna ba kynnoh ba ka la pynher ïa ka lama lai rong khlem jingbit, u nongïasaid aiñ ba rangbah u Gopal Sankaranarayanan uba mih na ka bynta ka Bora u la buh jingkylli ïa ka nongrim aiñ jong ka. “Ngim donkam ïa ka jingbit ban pynher ïa ka lama ka ri. Ki donkam ïa ka klas halor ka aiñ,” u la ong ha u Justice Subramonium Prasad.
U Additional Solicitor General u Chetan Sharma uba mihkhmat ïa ki pulit jong ka nongbah Delhi u la pynpaw ïa ka jingpyrshah halor ka jinglah ban pynneh ïa ka dorkhas jong ka Bora.
Ka Bora kaba la don hakhmat eh ha ki jingïakhih pyrshah ïa ka jingkynnoh ba ka don ka jingleh bymsuidñiew ha ka Election Commission ka Special Intensive Revision (SIR) ïa ki thup kyrteng thep vote, ka la pan ban weng noh ïa katei ka jingpynbna bad jingbthah sha ki pulit ba kim dei ban leh ïa kano kano ka kam pynbor pyrshah ïa ka.
Kane ka jingpynbna, kaba la pynmih ha ka 17 tarik, Risaw, ka long katkum ka kyndon 126 Bharatiya Nagarik Surak sha Sanhita (BNSS), kaba la bthah ïa katei ka nongïalam jong ki samla pule, ba kan leit hajir hakhmat u SEM (Special Executive Magistrate) ha ka 19 tarik, Risaw bad ban pyni ïa ka daw, balei ba kam dei ban pyntreikam ïa ka Personal Bond kaba T. 10,000 ka jingbuh na ka bynta ban wanrah ïa ka jingsuk na ka bynta ka por jong ka jingtohkit.
Ka kyndon 126 ka ai bor ïa ka SEM ban pynjari ïa kum kane ka jingsoi lada don ki jingtip kiba lah ban ngeit ba u briew u lah ban pynkheiñ ïa ka jingsuk, pynthut ïa ka jingsuk paidbah, lane leh ïa ka kam kaba bakla kaba lah ban pynmih jingkulmar.
La ïathuh ba ïa ka Bora, la rah ïa ka ha ka 16 tarik, Risaw, ha ka por ba ka don ha ka lynti ban ïadon bynta lang ha ka jingïaid paidbah jong ka Cockroach Janta Party (CJP) ka ‘Lehra Do Tiranga’. Ka la pyllait ïa ka ha ka 17 tarik u Risaw.
