Shillong, Nailur 18
Ka Jongksha SC ka la pynliem noh ïa ka Laitlyngkot SC da 6-1 kol na ka bynta ban khur ïa ka jingjop ha ka lympung ïalehkai Second Diovision Football League 2024 ba la pynïaid da ka Shillong Sports Association ha ka sngi Balang ha madan First Ground, Polo.
U Robert Khongjoh u la ïoh ban thep ar kol ha ka minit kaba 6 & 65, katba ïa kiwei pat la pynbud da u Basuklang Bina (21), Wanlambor Kharumnuid (45+2) , Ïohbor Nanglyer (56) bad u Frangky Nongspung (87). Katba ka Laitlyngkot ka la lah ban pynphai kylla shi kol lyngba u Skhemborlang Majaw ha ka minit kaba 47.
Haba phai sha kawei pat ka jingïakhun, ka Nongkrem SC ka la pynliem noh ïa ka Lumshyiap SC da 2-1 kol.
Watla ka Lumshyiap ka la ïoh ban pynkhih jar tang mar ïasdang ka jingïalehkai lyngba u Arki D Kharmalki ha ka minit kaba 11, hynrei ka Nongkrem ka la lah ban pynphai kylla ar kol lyngba ka penalty ba la shut da u Wilbert D Marbaniang (45+3) bad u Bhabokstar Shyrkon (81) na ka bynta ban khur syndon ïa ka jingjop.
Kane ka lympung kan bteng biang ha ka sngi Palei ha kaba ka Imson SC kan ïakhun pyrshah ïa ka Umphrup SC ha ka por 12:30, katba ka Smit SC ïa ka Sohïong SC ha ka por 3:30 janmiet.
