Kolkata, Nailur:
Ka jingïakren kaba la long ha ka sien kaba ar hapdeng ki doktor khynnah kiba la pynlong ïa ka jingïakhih bad ki heh jong ka sorkar West Bengal kam shym la lah ban urlong ha kaba ki doktor ki la ong ba kin sa ïai bteng ban pynlong ïa ka jingïakhih naba kam shym la don ka jingthoh ha ryngkat ka jingsoi ban pyntikna halor ka jingkubur jong ka sorkar ban pynbiang sha ki halor ki jingdawa ba ki la buh ha kaba ïadei bad ka jingshngaiñ jong ki ha ka hospital.
“Katba ka Myntri Rangbah jong ka jylla ka Mamata Banerjee ka la mynjur ban pynurlong ïa ki katto katne tylli ki jingdawa bad ka la don khyndiat por ka jingïakren halor ki jingïasoi bad ki jingbym treh ban ïasoi, ha kane ka kynti kaba mynta kam shym la don ka jingthoh ban pynthikna halor kane ka jingïakren,” la ong u Debsish Halder, uwei na ki doktor uba la don bynta ha ka jingïakhih.
“Hadien kane ka jingïalang kaba khatduh bad ka jingai rai jong ka Supreme Court, ngi la angnud ban ïohleit sdang noh ïa ka kam jong ngi hynrei ngi la shah pynduh mynsiem da kane ka jingïalang kaba mynta,” u la ong.
“Namar kata katba ngim pat ïoh ïa ka jingthoh ka ban pyntikna na ka sorkar ngin ïai bteng ïa ka jingïakhih. Ngi la angnud ban leit phai sha ka kam hynrei ngi hap ap katkum ki kyndon jong ka sorkar ha kaba ïadei bad ki sienjam ban pynïoh ka jingshngaiñ na ka bynta jong ngi bad hadien kane ngin sa shim ïa ka rai. Ngi la shah bthah ban ai da ka jingthoh halor ki jingdawa jong ngi bad ban phah da kaba Email sha u Chief Secretary,” u la ong.
