Shillong, Nailur 20:
Ha kaei ka ban long ka jingkyrshan kaba pdiang sngewbha ïa ka kriket jong ki kynthei, ka Meghalaya Cricket Association (MCA) kan pynlong ïa ka 1st Senior Women’s Interstate Friendship Tournament, kaba la pynlong hapoh ka jingpeit jong ka North East Cricket Development Council ha Nongkhrah, Ri-Bhoi, naduh ka 30 tarik Nailur 2024.
Ha kane ka lympung ïalehkai T20 yn ïashim bynta da 6 tylli ki jylla jong ka NECDC, kita ka Arunachal Pradesh, Manipur, Meghalaya, Mizoram, Nagaland bad Sikkim.
Ha kajuh ka por, ka Nagaland Cricket Association (NCA) kan pynlong ïa ka 2nd Senior Men’s Interstate Friendship Tournament, ka ban long ha ka rukom ïalehkai jong ka 50 over ha ka shisngi.
Ka NECDC ka dei ka met ban pynïaid beit ïa baroh ki kam kiba ïadei bad ka jingkyntiew ïa ka kriket ha ki 6 tylli ki jylla ha ka rukom kaba ïatylli.
U Nababrata Bhattacharjee (uba dei ruh u President ka MCA )uba long u Founder Co-Convenor ka NECDC u la pyntip mynta ka sngi ba kane ka lympung ïalehkai jong ki shynrang kan long naduh ka 23 haduh ka 28 tarik Nailur bad kan long ha ki ar tylli ki jaka – ka madan kriket ka Nagaland bad ka madan kriket ka Sovima.
Ïa kane ka lympung nyngkong jong ki kynthei yn pynlong ha madan ïalehkai ba dang shu dep shna thymmai jong ka Meghalaya Cricket Association, ha Pahamsning, Nongkhrah, Ri-Bhoi District naduh ka 30 tarik Nailur haduh ka 4 tarik Risaw.
Baroh ar tylli ki lympung ki thmu ban pynbiang ïa ka jingpynkhreh ïalehkai na ka bynta baroh ki kynhun shwa ban sdang ïa ki lympung ïalehkai hapoh ka ri jong ka BCCI 2024-25 ka ban sdang naduh u Lber.
Ha ka lympung ïalehkai jong ki shynrang, ka Nagaland, Sikkim bad Mizoram ki la don ha ka Group A, katba ka Group B ka kynthup ïa ka Meghalaya, Manipur bad Arunachal Pradesh.
Ha ka liang ki kynthei, ka Meghalaya, Arunachal Pradesh bad Manipur ki don ha ka Group A, katba ka Nagaland, Mizoram bad Sikkim ki don ha ka Group B.
