Shillong, Nailur 22
Kawei na ki ‘thei ïalehkai kaba na East Jaiñtia Hills, ka samla Phyrnai Kyndait ka la lah ban khur ïa ka jingjop ha ka jingïakob mareh jong ka 3rd Sohra International Marathon 2024 kaba la long ha ka Sngi Saitjaiñ ha Sohra.
Kane ka ‘thei ïalehkai kaba na Mukhaïalong, Khliehriat ka la khur ïa katei ka nam jop ha ka Meghalayan 21k jong kiba 18 snem shaneng ha ka liang ki kynthei da kaba lah ban pyndep ha ka 1 kynta, 29 minit bad 37 sekhon.
Haba ïakren bad ki nongthoh khubor, ka Phyrnai ka la pynpaw ba ka la trei shitom bad dohïap tang shibnai ban pynkhreh ïalade khlem da pynsepei ïa la ka por, hynrei kine ki jingtrei shitom kim shym la long long lehnohei ïa ka na ka bynta ban kynjoh sha ka thong.
Te kumta ka la pynpaw ruh ka jingsngewnguh ïa u Blei Trai Kynrad uba la aibor ïa ka ha ryngkat ka jingkyrshan bad ai mynsiem na ki bahaïing-bahasem, ki paralok parajor. “Nga pynpaw ka jingsngewnguh ruh ïa ka Meghalaya Cycling Association kaba la kloi ban ai jingïarap ïa nga ban pynkhreh na ka bynta kane ka jingïakob.”
