Shillong, Nailur 24
Ka Star Cement kaba long ka kompani pynmih dewbilat ka la wan shakhmat ba kan long ka nongbei tyngka ïa ka kynhun ïalehkai jong ka Shillong Lajong FC kaba dei kawei na ki klob kaba paw hapoh ka Jylla bad thaiñ shatei lammihngi jong ka ri India.
Ïa kane la pynbna da ki heh jong ka Star Cement ha ka jingïalang kaba la long ha ka Lah Sngi U Blei. Ka Shillong Lajong ka dei ka kynhun kaba ïashim bynta la bun snem ha ka lympung ïalehkai-I-League. Dangshen kane ka kynhun ka la poi shaduh ka semi final ha ka 133rd Durand Cup, hynrei ka la shah rem noh ha ka NorthEast United FC kaba la rah ïa ka nam lahduh.
Kum shi bynta jong kane ka jingïateh soskular, ka Star Cement kan ai ka jingkyrshan kaba donkam na ka bynta ki jingthmu ba dang ïaid jong kane ka klob, ki prokram pynroi ïa ki samla ïalehkai, bad kiwei kiwei.
Na ka liang u General Manager ka SLFC u Bah Habamutlang Lyngdoh u la pdiang sngew-bha ïa kane ka jingthmu, da ka jingkyrmen ba kane ka jingïatreilang kan ïarap ïa ka Shillong Lajong ban buh ïa ki thong jong ka ban kyntiew ïa ka jingïalehkai phutbol ha ka Jylla bad ha ka thaiñ shatei lammihngi.
Lah ban pynkynmaw, kham ha shwa kane ka kynhun ïalehkai ka la ïoh ka jingbei tyngka na ka tnat Jngoh Kai jong ka Sorkar Jylla.
