Lucknow, Nailur:
Ha shwa ban don ka ilekshon Assembly ha Haryana, ka heh nongïalam jong ka BSP ka Mayawati ha ka Lah Sngi U Blei ka la kyntu ïa ki nongïalam jong ki Dalit ba kin pyndkut noh ïa ka jingïatehlok bad ka Congress bad kiwei pat ki seng jong ki kynhun jaitbynriew bad ban bud ïa ka bynta ba la buh da u Dr BR Ambedkar. Kine ki jingkren ki la long ha ka por ba la thmu ban don ka jingïatreilang hapdeng ka seng Bahujan Samaj Party (BSP) bad ka Indian National Lok Dal (INLD) ban buh ïa ka ba kan long ka seng kaba khlaiñbor ha Haryana.
Ha kiba bun ki jingphah khubor ha ka rynsan X, ka Myntri Rangbah barim jong ka Uttar Pradesh ka la kynnoh ba ka Congress bad kiwei pat ki seng jong ki kynhun jaitbynriew ka la pyndonkam ïa ki nongïalam jong ki Dalit tang ha ka por ba ka don ha ki jingeh bad hadien kane kan sa kiar bad leh jngai noh na ki.
Ka la ong, “Ki jinglong-jingman ha kaba ïadei bad ka kam saiñ pyrthei ïa mynta ka la pynshisha ba ka Congress bad kiwei pat ki seng jaitbynriew ki kynmaw ïa ki Dalit tang lada ki don ha ki jingeh bad thung ïa ki kum ki Myntri Rangbah ne ha kiwei pat ki kyrdan tang shipor. Hynrei ha ki por ba kim ïakynduh jingeh kine ki seng ki ieh bad kiar ïa ki Dalit bad buh ïa ki ha ka kynhun jong ki jaitbynriew, kumba ka long mynta ïa kaba la sakhi ha Haryana,” ka la bynrap. Ka Mayawati ka la khot ruh ïa ki nongïalam jong ki Dalit ban shim nuksa na u Ambedkar bad kiar noh na kum kine ki seng.
Ka Mayawati ruh ka la kynnoh ba ka Congress ka la ju pyrshah na ka por sha ka por ban mang ïa ka bhah bakyrpang na ka bynta ki Dalit bad kiwei pat ki kynhun ba dang sahdien. Kum ka jingkynthoh pyrshah ïa u nongïalam jong ka liang pyrshah ha Lok Sabha u Rahul Gandhi, ka la ong, “Ka seng Congress bad kiwei pat ki seng jaitbynriew ki la long pyrshah ïa ka jingbhah kyrpang.
U Rahul Gandhi u leit wat shabar ri bad pynbna ban pynkut noh ïa ka bhah mang kyrpang. Ki paidbah ki la dei ban long kiba husiar na kum kine ki riewpyrshah ïa ka Riti synshar, kiba pyrshah ïa ka bhah kyrpang bad kiba pyrshah ïa ki kynhun ka SC,ST, OBC.”
