Ranchi, Risaw:
Ka sorkar Jharkhand, ka la hukum ban khang ïa ki skul, haduh ka 29 tarik Risaw, ha ki katto katne ki distrik, hadien ka jinghap slap, kaba la pynmih da ka eriong ‘Arnab’, kaba la wan hiar ha ki rud duriaw jong ka Andhra Pradesh, ha ka por mynstep jong ka sngi Balang, ong ki heh sorkar.
Ki bor synshar jong ka Ranchi, West Singhbhum, East Singhbhum bad Simdega distrik ki la ïathuh ba ki skul kin dang khang ha ka sngi Balang bad sngi Palei.
Ka jinglong ka mariang ka la ktah ïa ki rud duriaw jong ka Andhra Pradesh hapdeng ka Bapatla bad ka Visakhapatnam kum ka erïong kaba jur bha, ha kaba ka jingstet jong ka lyer ka long 125-135 km/h kaba beh haduh 150 km/h.
Ka jingpynkhreh ïa ka khyndew ka la sdang ha ka por 1.20 baje mynstep, la ong ka IMD.
Ki District kum ka Ranchi, West Singhbhum bad East Singhbhum ki la mad ïa ka jinghap slap shiteng por naduh ka miet jong ka sngi Ba-ar hapoh ka jingktah jong ka erïong, ong ka khubor.
“Ha baroh ki skul sorkar, ki skul ba ïarap da ka sorkar bad ki skul shimet kiba treikam hapoh ka Ranchi distrik, ki kam pule puthi na ka bynta ki klas KG haduh 12 kin dang shah pynsangeh ha ka 28-29 tarik u Risaw,” la ong ka kyrwoh khubor.
U Abhishek Anand, Deputy Director ka Ranchi Meteorological Centre, u ïathuh ba ka jinghap slap kaba rit, ka la jia ha kiba bun ki distrik jong ka Jylla, naduh ka miet jong ka sngi Ba-ar namar ka jinglum lang jong u lyoh ha ka erïong.
“Ka jingktah kaba khraw jong ka erïong kan sa paw halor ka Jharkhand hapdeng ka janmiet jong ka sngi Balang shiteng sngi bad ka sngi Palei,” u la ong.
