Bhopal, Risaw:
Lah ban kdew hangne ba haduh 340 tylli ki kot jingithuh nongthep vote, kiba don baroh ki address ha Indore, la lap ba la iehnoh ha shilynter jong ka wah Narmada ha Mandleshwar Ghat ha Khargone distrik jong ka Madhya Pradesh ha ka Sngi U Blei.
Ka liang pyrshah ka Congress ka la dawa ban mudui da ka ejahar bad ban pynlong ïa ka jingtohkit kaba khlem shah liang.
Ki dkhot jong kawei ka seng kaba pynlong ïa ka jingpynkhuid shnong ha Mandleshwar Ghat ki la ïohi ïa ki card kiba per ha ka um bad kiba la sah harud ki rud wah. Ki nongshong shnong ki la lum ïa ki card bad pyntip sha ki bor synshar. Ka video kaba pyni ïa kitei ki card shen ka la saphriang bha ha ki social media.
Ka jingtip ba nyngkong ka ïathuh ba kitei ki card ki dei jong ka Rau Assembly konstitwensi kaba don ha Indore district, kaba jngai kumba 90 km eiei. Ki jaka sah kiba la thoh ha ki Electoral Photo Identity Card (EPICs) ki kynthup ïa ka Tilak Nagar bad ka Aastha Palace ha Indore. Ym pat lah ban tip kumno ki card ki poi sha wah, mano ba bret ïa ki bad hato ki dei kiba shisha ne em.
Ki thymmei khubor na Khargone, ki ïathuh ba kiba bun na ki 343 tylli ki card, kiba la lap hapoh bad sawdong jong ka Narmada, ha ka Sngi U Blei, ki dei kiba ïadei bad ka Rau, ha kaba u heh jong ka seng Congress jong ka jylla, u Jitu Patwari, u la jop ha u snem 2013 bad 2018, shuwa ba un shah rem noh ha u snem 2023.
Ka ophisar jong ki pulit jong ka Mandleshwar Sub-Divisional ka Shweta Shukla ka la ong ba ka kynhun jong ka Revenue ka la kurup ïa kine ki card bad la bthah ïa u Police Station In-charge ban tohkit. Ka la pynthikna ba ki pulit ki la ïoh ïa ka jingujor na ka Congress.
U Ravi Naik president ka Congress district, ha ryngkat u president ka block u Himmat Singh Patel bad kiwei kiwei ki nongtrei jong ka seng ki la aiti ïa kane ka jingujor ha Mandleshwar Police Station. U Naik u la buh jingkylli ïa ka jingtreikam jong ka Election Commission bad u la maham ruh ba ka seng kan ïakhih ha thanad lada ym mudui ïa ka mukotduma halor kane.
Haba kdew sha ki tarik kiba don ha ki card, u Naik u la kynnoh ba ki don ïa u snem 2016, watla ïa ka rukom Digital Card la pynrung tang ha u snem 2021. U la buh jingkylli kumno kum kine ki card ki lah ban mih kham mynshwa bad u la batai ïa ka jinglap kum ka sakhi kaba shai bha jong ka “jingtuh vote”.
U Naik u la kynnoh ba ki pulit bad ka bor synshar ki don hapoh ka jingpynbor bad ki dang pyrshang ban tohkit shwa shwa ban shim khia. U la kynthoh ba ka jingtohkit kyrpang kam donkam, namar ba ka jingpynrung ïa ki nombar EPIC ha ka system kan pynshisha la ki card ki dei kiba shisha ne em. Ka Congress ka la pan ruh ban phah ïa ki nongleit jngi ban talasi ïa ka wah ban ïoh kham bun ki karta.
La lap ïa ki jinglap kiba kum kine ha kiwei pat ki jaka. Ha Chhatarpur distrik jong ka Madhya Pradesh, da ki spah tylli ki ID card jong ki nongthep vote la lap ha ka pung Raja Talab ha ka por ba pynkhuid ha u bnai Risaw 2025.
Ka liang pyrshah ka la kdew ïa kane ka jinglap kum ka jingkyrshan ïa ka jingkynnoh jong ka ba la tuh ïa ki vote.
