Shillong, Nailur 24
Kan dei ka sien kaba nyngkong eh ïa u ‘rang ïakura ka Jylla u Shanborlang Marbaniang ban leit ïashim bynta shabar ri ha kaba un pynkhreh ïa ka rynsan ïakura ha ka ‘Rise of Champions’ ka ban long ha Bangkok kaba ha Thailand.
Utei u ‘rang ïakura uba na Laimer, Upper Shillong un ïakhun pyrshah ïa u Jayson Paden Vayson uba dang 24 snem ka rta na Philippi ha ka Light Flyweight Bout kaba don haduh phra tylli ki kylla ïakhun ka ban long ha ka 26 tarik mynta u bnai.
Ïa katei ka rynsan ïakura yn pynlong da ka Highland Boxing Promotion, Thailand bad u Shanborlang u la mihkhmat ïa ka ri India na ka CSM Promotion
U Jayson u dei u ‘rang ïakura uba bat ïa ka kyrdan ba 18 ha ka pyrthei, ha kaba u la jop 12 sien, ïakhaid shisien bad shah rem shisien, katba u Shanborlang u la jop san sien, ïakhaid ar sien bad shah rem ar sien.
Kumta utei u ‘rang ïakura ba paw ka Jylla u la mih na ka nongbah Delhi ha ka Sngi Ba-ar ban leit sha Bangkok. Wat la ka dang dei ka sien kaba nyngkong eh ban leit ïashim bynta ha katei ka rynsan ïakura shabar ri, hynrei la khmih lynti ba un ïalehkai bha ha katei ka rynsan ïakura khnang ba un lah ban kynjoh sha ka thong.
