Shillong, Jylliew 15
Ka Germany ka la lah ban pynpaw ïa ka jingtbit ha ka jingïalehkai kaba nyngkong ha ka FIFA World Cup 2026 hadien ba kane ka kynhun jong u Julian Nagelsmann ka la lah ban pynliem noh da 7-1 kol ïa ka Curaçao kaba long ka kynhun kaba la rung nyngkong eh sha kane ka lympung bad kaba long ka ri kaba rit ha ka pyrthei, ha ka sngi U Blei ha Houston.
Kane ka jinglah ban thep kol bun ka Germany ha kane ka lympung ka la lah ban tam ïa ka Brazil ha ka jinglah ban thep kol bun ha ka lympung ïalehkai World Cup.
Kane ka kynhun kaba la bat saw sien ïa ka nam lahduh, ka la rung sha kane ka lympung ha kaba ka la tam da 5 kol ïa ka Brazil kaba la bat san sien ïa ka nam lahduh kata da 232 kol bad mynta da ka jinglah ban ïalehkai bha ha NRG Stadium, ka la kiew sha ki 239 kol haba kheiñ lang baroh.
Kumba ka paw ka Brazil ka la thep 238 kol, ka Argentina ka la thep 152 kol, ka France (136 kol) bad ka Italy (128 kol).
Kane ka jingjop ka pyndap sa kawei pat ka lynnong ïa ka Germany ha ka World Cup namar ka la lah ban ïa ka Brazil ha kaba ka lympung kaba la pynïar sha ki 48 tylli ka jingdon ki kynhun ha kane ka lympung kaba la long ha America, Canada bad Mexico.
Ha kane ka jingïakhun u Felix Nmecha u la pynkhihjar nyngkong ha ka minit kaba 6 hadien ka jingïarap pynbuh da u Florian Wirtz. Hynrei ka Curaçao ka la lah ban pynphai kylla lyngba u Livano Comenencia ha ka minit kaba 21 bad kane ka la pynkmen shipor ïa ki nongkyrshan jong ka.
Ka jingïakhaid ka la neh haduh ka minit kaba 38 hashwa ba u Nico Schlotterbeck u thep ïa ka kol kaba ar na ka bynta ka Germany lyngba ka corner ba la shut da u Nathaniel Brown. Hashwa ban wai u Kai Havertz ula la thep kol lyngba ka penalty na ka bynta ban tam da 3-1 kol ha ka kylla step.
Ïa kiwei pat ki kol ha ka kylla miet ka Germany ka la thep biang lyngba u Jamal Musiala (47), u Brown u la pynbud biang sa shi kol ha ka minit kaba 68, Deniz Undav (78). U Havertz u la thep biang sa shi kol hashwa ban wai na ka bynta ban jop da shiteng dorjon.
Ka Germany kan pynkhreh ïa ka jingïakhun ka ban wan pyrshah ïa ka Ivory Coast ha ka sngi Saitjaiñ ha Toronto.
