Shillong, Jylliew 15
U rangïalehkai ka Jylla u Bankerlang Myrthong u la khur ïa ka takma rupa ha ka UWW Pankration & Amateur MMA Asian & Oceania Championship 2026, kaba la long ha Da Nang, Vietnam, ha kaba ka la poi sha kaba kut ha ka 9 tarik mynta u bnai.
U Bankerlang u la khur ïa katei ka takma ha ka kyrdan ïalehkai U-20 (57kg).
Kumba ka paw ki la don ar ngut ki rangïalehkai ka Jylla kiba la mihkhmat ryngkat ïa ka kynhun ïalehkai ka ri kynthup ïa u Francis R. R. Songthiang (Senior 66 kg), uba la pyrshang ban ïalehkai bha ban pyni ïa ki sap ba kyrpang hashwa ba un shah rem noh.
Halor kane ka jingwanrah nam bad burom, na ka liang ka All Meghalaya Traditional Wrestling & Pankration Association (AMTWPA) ka la pynpaw ka jingsngewsarong halor ka jingïalehkai bha kitei ki rangïalehkai ka Jylla ha katei ka lympung kaba la sdang naduh 7 haduh 9 tarik mynta u bnai ha Vietnam. Ïa kane ka kynhun la synran lang da u coach u Bah Donny Rafeal Ranee.
Na ka liang ka President ka AMTWPA, ka Kong Anita Songthiang ka la ai khublei ïa kine ki nongïalehkai lem bad ka kynhun ïalehkai ka ri kiba la lah ban ïalehkai bha. Kane ka jinglah ban khur jingjop ka pyni ïa ka mynsiem ka jingtrei shitom ha ryngkat ka jingkut jingmut bad ka long ruh ka jingai mynsiem na ka bynta ki nongïalehkai ka Jylla kiba dangkhie dangsan.
Te kumta na ka liang ka AMTWPA lem bad ka Meghalaya School of Martial Arts (MSMA) ki la ai ka jingkitbok lem bad ki coach ba kin nangkiew shaphrang ha ka ban tyngshaiñ kum ki khlur na ka bynta ka Jylla.
